Wy brodere Johan prior, Hinrik leysemester, Herman subprior unde de gantze convent der predeker orden to Hildensem bekennen openbare in dessem breve vor us unde unse nakomelinghe, also wy en schone klenoide dat is ene monstrancien, de wy hebben van vordernisse unde hulpe des erbaren ratmannes unde borgheres to Hildensem Johannes des Resen unses procuratores unde ok anderen vromen lude, de dar dat beste to ghedan hebbet, dat wy ichte nemen von user weyghen, de us jeghenwardich ichte hir na dessen tiden tokomende sin, nicht schullen, willen ichte moghen vorkopen, vorsetten ichte vorpenden dorch nenerleye anvalles, node ichte behoves willen, de uns unde use vorghenomet closter sunte Paules des vorghescreven ordens anvallen mochte. Weret ok, dat desse vorghenomede monstrancie dorch node ichte unlimplikes ghebodes weyghen, wu dat ghescheghe, vorkoft, vorset ichte vorpendet worde, des ghod nicht wille, so vorplichte wy os darto, dat wy schullen unde willen gheven den erwerdeghen borghermester unde ratmannen to Hildensem teyn fine mark sulvers ichte so vele, dar se alsodanen monstrancien mede tughen mochten ichte laten maken, de se denne moghen gheven, wur on dat ghud dunket weysen. Desses to ener mereren vorwissenighe so hebben wy uses closters ingheseghel mid user aller wischop ghehenghet an dessen breff, na godes bord Verteynhundert iar darna in dem tweundetwinteghesten iare, in den hilghen daghe sunte Dominicus unde hilghen vaders.