Wy de raidtt tho Bokenem bekennenn openbare in dussem breve vor uns, unse nakomenn unnd alsweme, dath wy van den werdigen und geystliken hernn bynnen Hildensem to sunte Pauwel prediker orden affgekofft hebben arfflick orer termenyehus und wonunge myt der gantzen stede in unser staidtt belegen by dem kerckhove vor vertich gulden munte Hildensemischer werunge und geven dartho ohne und oren nakomen eyn hus und wonunge wedder belegen upp dem kerckhove in unser staidtt, dar nu thor tidten de Diderikesche inne woneth, twiscken sunte Annen vicarien und sunte Pancratius husern, und befrygen daith sulve redegenante hus den gemelten hern und oren nakomen myt aller gnade und fryheyt, wu van olderher orer termenyehus, nu an uns gelanget, gefrygeth was, und ist nichts darvan uthbescheiden. Ock wille wy de raidtt alse na dode der Diderikeschen vorgemelt dem sulven huse thor stratenwordt noch idtlike vote langk und rum, alse her Johan Berchmans huestender an der stratenwordt uthwiset, schreyne overtogen her Jordan Odenhusen hustender an der straten myt eyner lynnien darher getogen und gemeten thor uthmelden des vorgeschreven huses gunnen und vor eynen hoiff geven etc. Alle dusse vorgenanten artikele intsampt und bysundern reden und loven wy de raidtt vorbenomt den gemelten hern und oren nakomen stede und vast unvorbroken wol tho holende ane jenninge insage, argelist, nygefunde edder behulprede etc. Dusses in bekantnusse hebben wy unser staidtt ingeseggel widtlick dhon hangen neden an dussen breiff, gegeven nach der geborth Cristhi unses hern Vefftheinhundert und sesunddrittich jare, am avende Petri und Pauli der hilligen appostel etc.