Wy brodere Conradus prior, Jacobus lesemester, Johannes underprior unde de gantze convent des closters sunte Pawels beleghen in deme Brule vor Hildensem bekennen openbar in krafft disses breves vor uns unde al unse nakomelinge, dat wy endrechtychliken vorwillen unde vorplichten uns to ener ewyghen memorien stede unde vast tho holdende des anderen sondaghes in der vasten myd vigilien unde des mandaghes darna myd selemyssen vor de vorstorvene selen seligher dechtnisse, alze benemeliken Albrecht Lecstede, Werner van Gronow, Mette sin husvrouw, Mette unde Conrades unde Werner der kyndere, Otte Yserman, Hans van Norten, Ludeleff van Huddessem unde syner husvrouwen unde der kyndere, unde Alheyd, de en husvrouwe west is Borchard van Huddessem, unde alle de uth deme slechte vorstorven syn unde dartho vor alle cristene selen alle iar in unser kerken. Vortmer de preester, de de myssen synghende wert, de schal vor deme offertorio muntliken unde benemeliken overal dencken disser vorgescreven selen, dar wy brodere des vorbenomden klosters up entfanghen hebben ene mylde almissen van Borghard van Huddensem unde Katterynen syner erliken unde eeliken husvrouwen, welker almissen wy ghekered hebben in unses closters beste unde nutticheyt. Ok schal de sulve prester vor dem altare vormanen dat volk, dat dar jeghenwardich is, myd vlyte tho biddende vor de vorbeinomeden zelen. Disse vorscreven stucke vast unde stede tho holdende unde tho meer bekantenisse unde tughynge so hebbe ik ergenante Conradus prior unde dat gantze convent unses closters mene ingheseghel laten henghen an dissen jeghenwardighen openen breff, de ghegheven unde ghescreven is na godes bort Dusent veerhundert enundeseventich yar, des mandaghes na der Hilghen Dryer Konninghe daghe.