Ek Brun van Linde, Hinrikes seligher sone, bekenne openbar in dussem breve vor mek, myne erven unde alsweme, so alze de werdighen heren domprovest, domdeken unde capittel tho Hildensem afghekoft hebben up eynen wedderkop vor dritteynhundert ghude Rynsche ghulden van Diderike van Lynde mynem vedderen dat halve ampt to Lexstede myt luden, denste, thegheden, richten, ungherichten, hoven, tynsen, lande, holte nemliken de Quemenborch half, weyde, water unde aller thobehoringhe, so alse de breff, den he onhne darover ghegheven heft unde vorseghelt, uthwiset unde inhold, unde ek doch nu wanteheer tho darynne ghewillet, ghevulbordet edder eyne ghentslike vorticht ghedan hebbe, aver numeer vorwille ek unde vorvulborde den sulven mynen heren dem capittel vorbenomet jeghenwordighen in unde myt kraft dusses breves, so dat se degenne edder -gennen, deme se dat bevelen des sulven halven amptes tho Lexstede myt aller tobehorynghe, nichtes dar uth bescheden, alze see dat ghekofft hebben, bruken schullen unde hebben myt aller nut unde upkome ane myne, myner erven unde jemendes van myner weghen insaghe edder hindernisse, solanghe ek edder myne erven ohne sodane ghelt, so vorgheschreven is, al wol tho eyner vornoghe wedder entrichtet unde betalet hebbe. Hyrmede vortige ok jeghenwordighen in krafft dusses sulven breves alles behelpes gheystlikes unde wertliken rechtes, ek efte myne erven uns teghen den ghenanten kop unde bref, aver meer den kop vorseghelt unde dussen breef behelpen mochten. Alle dusse stucke unde artikel, so vorgheschreven is, love ek Brun van Linde unde myne erven dem erbenomden unde werdighen mynem heren deme capittele tho Hildensem in ghuden truwen stede, vast unde ane alle behelp wol tho holdende, unde hebbe des to vorder wyssenheyt unde bekantnisse dyssen mynen breeff myt mynem ingheseghele vorsegheld ghegheven, unde is ghescheen na der ghebort Christi unses heren Dusent veerhundert darna in deme in deme [!] vifundesestighesten jare, amme daghe sancti Anthonii Confessoris.