Wy Busse Speigell kelner, domher der kercken tho Hildenssem, obedientiarius in Arberge, unde Hinricus Buringk, vicarius des altars sancti Steffani darsulvest, bekennet unde betuget opentlick in dussem breve vor uns unde unse nakomelinge desser sulven obedientien unde vicarie, dat wy belenet hebben und belenen jegenwordigen in crafft desses breves mith hande unde mith munde Hermen Helmes tho Arberge alse den oldesten syner broder, veddern unde syner rechten manerven mith eyner halven hove landes belegen up dem velde vor Arberge unde mith eynem kothove darsulvest, szo syne vorfharen dat in vortyden vor eyn leynerve gehadt heffet unde van Bartolde Meyer in vortiden upgedragen, unde eynen kothoff, den Hans Lauwenkop tho leyne gehadt heffth. Hyr scal de sulfftige Hermen Helmes unse truwe man aff wesen, unse beste weten unde argeste wernen, so dat wontlick is, unde wy willen unde schullen dusses vorscreven gudes unde leynwar syn bekenninge hernn unde warende wesen, wan ohme des noith unde behoff is unde dat van uns esscheth. Dusses tho bekantnisse hebbe ick Busse Speigel vorbenompt myn ingesegel gehenget an dussen breiff, des ick Hinricus Buringk alhyr tho mede gebrucke, gegeven na goddes geborth Dusenth viffhunderth unde im vhervyffundedrittigesten jar, des sonnavendes na sunte Lucien daghe.