We Otto van Halremund, van goddes ghenaden domhere des stichtes to Hildensem, bekennet in desseme breve, de beseghelet is mid useme ingheseghele, dat we deme rade van Hildensem vor Henninge Bussen ghelovet hebben neghen lodighe verdinge enes lodes min Hildensemescher wichte unde witte, aldusdanewis, weret, dat Henningh Bussen storve vor deme neysten sencte Mertenes daghe, wanne we denne darna van des rades weghene van Hildensem ghemanet worden, so scolde we binnen den neysten verteynnachten na dere maninge deme selven rade dat vorscrevene gheld ghensliken betalen, sunder ienigherhande vortoch. Is ot aver, dat Henningh Bussen den neysten sencte Mertenes dach van desser tit aflevet, so sculle we desses gheldes vor one to betalende vortmer unverbunden wesen. Alle desse vorscrevenen dingh hebbe we deme vorsprokenen rade an truwen ghelovet unde lovet unde lovet in desseme breve umbrokeliken to holdende, unde is gescen na goddes bord Dritteynhundert jar in deme enundevefteghesten jare in unser vruwen avende alse se bebodescapet ward.