Wy Hinrich grave to Swartzepurg, here to Arnstede und Sunderßhusen und domprovest to Hildensem bekennen openbare in dussem brieve vor alßweme, dat wy hebben belegen unde belenen in crafft dusses breves mit hande unde mit munde alß lenesrecht is Hans Brandis, borger to Hildensem, to einem rechtin erffliken manlene, also sein vadere Hans Brandis zeliger vonn unse to lehne gehadt hefft, mit drittich Hildensemer schilling, mit dren Hildensemer pennighen und mit der vogedie mit oren tobehoringen belegen upp dem Eselstige an dussen nabeschrevenen husen und woningen: sesse schilling der vorbenomeden weringhe an Hinrick Smedes husse, viff schilling und dre pennig an Reyneken Janbarthen huß, twe schilling an Hinrick Ropen huß, dre schilling an Ludeken Honoveren huße und vifteyn nighe phennig an sinem nyen huß darby, vifteyn phenning an Cordt Nolten huße, verdehalven schilling an Ditterick Lachauwen huße und achteyn schilling an Borchardeß Rodemundes huße. Alle der vorgeschrevenen weringhe und duth benomede gelt schullen de besitterß der benompten achte huseren unde woningen rauweliken uthgeven, de helffte upp sunte Michaelis dach unde de andern helffte umpp Paschen, unde wy Hinrich grave to Swartzepurg etc. vorbenompt willen unde schullen der vorgheschrevenen lenware unde vogedie sin rechte gichtige bekennige here wesen, wur und wanne dat von unse gheeschet worde und des behoff unde not is, und hebbet dusses to bekentinisse unse ingesegel witlicken ghehenget laten an dussen breve, na goddes borth Vertehenhundert jare darna in dem vereundachtigesten jare, am mittwocken na Conversionis Pauli.