Wir Wilhelm vonn Gotts Gnadenn Grave zu Holstein, Schoumburgk unnd Sternebergk, Her zu Gemen, Thumbprobst deß Stifftz Hildensheim unnd Probst zu Messchede, bekennen offenbar in diesem offnen besiegelden Briefe vor unns, unsere Nachkomen unnd jedermenniglich, daß wir belehenet habenn unnd belehenen jegenwertigen mit Handt unnd mit Munde in unnd mit Crafft diß Brieffs alß Manlehensrechts Recht ist zu einem rechten volstendigen Erbmanlehen denn erbarn unsernn lieben Getreuen Tile Barnner alß dem Oldistenn mede Zubehuif seiner Vettern mit unser Thumbprobstey zubehorigem Lehengude, als nemblich sechs Höfen binnen unserm Dorffe Borsum unnd einem Höfe binnen unserm Dorffe Honnersem belegenn, mit aller Zubehorung unnd Rechticheidenn in Dorffe unnd im Velde, nichts darvon außbescheidenn, unnd wir wollen gemelten Bernnern dieser vorgeschrieben Höfe unnd Lehen mit ihrenn Zubehorungen rechte bekenninge Her unnd Warendt wesenn, so offte deß Noid unnd Behoif unnd vonn unns geheischet wirt, dagegen unnß obgemelter Tile Barnner vor sich, seine Vettern unnd ihrer aller Manserben gewonliche Eide unnd Geleubte gethann, allsolliche Höfe unnd Lehen treulich zu bethienen unnd zu vorwaren laut seinem unns zugestaltem unnd versiegeltem Reverß daruber ufgericht, unnd habenn deß in Uhrkunde der Warheitt unnsern angebornnen Ingesiegel beneden ahnn diesenn Brief hanngenn laissenn, der gebenn ist nach Christi unnsers Erlosers unnd Seligmachers Geburt im Tausent funfhundert unnd siebentzigstenn Jahre, der dreyunndzwanzigstenn Monatstag Novembriß.