Wy Bertolt van godes gnaden byschop to Hildensem bekennen openbar in dussem breve vor uns unde unse nakomen, dat wy belenet hebben unde jegenwardighen belenen tho eynem rechten manlene Bertolde Magherkole myt eyner hove landes beleghen uppe deme velde tho Schellerten unde myt eynem hove teghetfrig beleghen beleghen [!] in deme sulven dorpe myt allen oren rechticheyt, wo me de benomen mach. Wy hebben ok umme des vorscrevenen Bertoldes bede wyllen beliftuchtighet unde jeghenwardighen beliftuchtighen in unde myt crafft dusses breves Kunnyken, des genanten Bertoldes eliken husfrouwen, myt der vorscreven hove landes unde hove. Wy willen ok unde schullen ome rechte bekennighe here unde ware wesen, wor unde wanne one des noet is unde se dat van uns eschen. Weret ok, dat he van dodes weghen vorvelle unde syne erven dat vorgenante goet van uns tho lene entphan wolden, so scholden se uns geven eynen verdingh unde des scholde wy one nycht vorhoghen. Des tho bekantnisse hebbe wy unse ingesegel witliken ghehanghen heten nedden an dussen breff na Cristi ghebort Verteynhundert jar darna in deme eyneundeachtigesten jare, an deme daghe sancti Bonifacii des hilghen bischoppes unde martellers.