Wy Bartold van gods gnaden bisschup to Hildensem unde administrator der kercken to Verden bekennen openbare in dussem breve vore uns unde unse nakomen bisschuppe to Hildensem, dat wy belehnt hebben mit hande unde munde alse lehnsrecht is unde belehnen in unde mit dussem breve to eynem rechten ervenmanlehne den ersamen Hanse Brandes den elderen, unsen borgeren to Hildensem, mit veirdehalvere hove landes vore unser stad Hildensem uppem Oldendorper velde belegen, mit deme halven tegeden to Emmerke, mit der Kligkmolen twisschen Hase unde Vorste unde noch mit eyner hove landes up dem Oldendorper velde mit aller sclacht nuth unde tobehoringe in holte, in velde, in water, in wischen unde in weyde, wu men de benomen mach, alse de genante Hans Brandes dat vore van unseme vorfaren unde stichte to Hildensem to lehne gehat hefft, unde willen ome dusser vorgescrevenen gudere sin bekennige here unde waren wesen, wure unde wan ome des noit unde behoff is unde dat van uns geesschet wert. Des to bekantnisse hebben wy unse ingesegell an dussen breff witligen heten hengen nach Christi unses heren gebort im Veirteynhundersten unde eynundeachtentigesten jare, am mandage na sunte Mathies dage des hilgen Apostelß.