Wy Johan van gots gnaden bestedigede here des stiffts to Hildensem, hertoge to Sassen, Engern unde Westvalen, bekennen openbar in dessem breve vor uns unde unse nakomen, bisscuppe to Hildensem, dat wy hebben belehnet unde belehnen jegenwordigen in crafft desses breves to eynem rechten ervemanlehne Hermen Barse, borger to Peyne, mit dem halven tegeden to Schilpe unde mit anderhalver hove landes darsulves belegen unde mit eynem ferndel des tegeden to Merem myt aller slachte nut unde tobehoringe in holte, velde, dorpe, grase, water, weyde unde mit den worden, de darto horet, aller mathe, so he de sulven guder van unsem vorfaren unde stiffte to lehne gehat unde entfangen hefft, unde willen des lehnes unde gudes sin rechte bekennige her unde ware wesen, wor unde wan om des not unde behuff is unde van uns geesschet wert ane alle geverde. Des to bekantenisse hebben wy unse ingesegel witliken don hangen an dessen breff nach Cristi unses hern gebort Dusent viffhundert unde veer jar, am dinsedage na Symonis unde Jude apostolorum.