Wy Johann van gots gnaden bestedigede her des stiffts to Hildensem, hertoge to Sassen, Engern unde Westvalenn, bekennen openbar in dessem breve vor uns unde unse nakomen, bisschuppe to Hildensem, dat wy hebben belehnet myt hande unde munde unde belehnen jegenwordigen in crafft desses breves to eynem rechten ervemanlehne den ersamen Hanse Brandes, borger unser stadt Hildensem, myt anderhalffer hove landes unde dren kothoven im dorpe unde up dem velde to Hogenhamelen belegen mit aller nut, tobehoringe unde gerechticheit in dorppe, velde, water, wisschen unde weyden, wo men de benomen unde sick der gebruken mach, nichts uthbescheiden, in aller mate, so he dat sulve gudt van unsem vorfaren unde stiffte to Hildensem to lehne gehat hefft. Ok hebben wy Hanse Brandes vorbenomd umme ziner bede willen vorlovet unde vorgont, dat he syne eliken husfruwen mit dessen vorbenomden guderen mach belifftuchtigen unde wy belifftuchtigen se hyrmede jegenwordigen in crafft desses breves unde willen unde schullen Hanse Brandes desses lehnes unde gudes to eynem erffliken manlehne unde ziner eliken husfruwen der lifftucht rechte bekennige her unde ware wesen, wor unde wan des not unde behuff is unde van uns geesschet wert ane geverde, unde hebben des to bekantenisse unse ingesegell witliken don hangen an dessen breff nach Cristi unses hern gebort Dusent viffhundert unde veer jar, am mandage na Egidii confessoris. ||
||
[Vermerk auf der Rückseite] Dißes Lehen ist B. Bartram Brandis Söhnen genommen vom Lehen-Secret[är] Christoph Abel Anno etc. 1655.