Wy Johann van gots gnaden bestedigede her des stiffts to Hildensem, hertoge to Sassen, Engern unde Westvalen, bekennen openbar in dessem breve vor uns unde unse nakomen, bisschuppe to Hildensem, dat wy hebben belehnet unde belehnen jegenwordigen in crafft desses breves to eynem rechten ervemanlehne den ersamen Henninge Kaln, borgermester, unde Clawese Gronhagen, borger to Brunswick, in eyn zamptlehen mit der molen to Eltze unde aller orer tobehoringe unde gerecheit [!], nichts uthbescheiden, mit eynem hofe to Eltze darupp wonede Lutman, geheten der Ludemanne gud, mit dem Borstelgude to Eltze, mit eynem huse unde hove vor Peyne dar Henningk Knoke upp wonede, unde mit eyner tegetvryen hove landes, de dar buwede Berndt Odinck, belegen up dem velde to Solsen, mit alle desser guder rechticheiden unde tobehoringen, wo men de benomen unde sick der gebruken mach, nichts uthbescheiden, in aller mathe, so se de sulven guder tovorn van zeliger bisschuppe Bartolde unsem vorfaren unde stiffte to Hildensem to lehne gehat unde entfangen hebben, unde willen on desses lehnes unde gudes or rechte bekennige her unde ware wesen, wor unde wan one des not unde behuff is unde van uns geesschet wert ane geverde, unde hebben des tho bekantenisse unse ingesegel witliken don hangen an dessen breff na Christi unses hern gebort Dusent viffhundert unde viff jar, am sonnavende na Circumcisionis domini. ||
||
[Vermerk saec. XVIII auf der Rückseite] jetzo die von Eltze zu Zelle.