We Symon van gnade goddes greve to Dasle bekennet in disseme breve, dat we hebbet vorkoft unseme herren biscope Sifride van Hildensem unde sineme stifte dat hus to deme Hundesrücke unde dat wicbelede to Dasle mit eghendome unde aller nuth unde de grafscop mit deme vryen gude, mit luden unde mit alleme rechte unde bi namen den eghendom disser dorpe: Reylinghusen, Hildeleveshusen, Dethersen, Selessen, Wolderikessen, unde oc alle eghen, dat in der grafscop unde disser herscop leghet, dat unse was ledich unde vorleghen, vor neghenteynhundert marc lodeghes silveres Hildensemescher wichte unde witte. Dat silver schal men os unde unser husvrowen vru Sophyen unde greven Heynrike van Reghensteyn unde unsen rechten erven alsus bereyden, to den Pinkesten de nu erst komet vifhundert marc, to Winachten darna allererst verhundert marc in sowelker stat we et keset to Goslere eder to Hildensem. Vor dusent marc schal de vorbenomde unse herre biscop Sifrid uns vorwissenen latan1 hundert lodeghe marc gheldes van vifundetwintich closteren unde stiften, de in sineme biscopdome stat, mit eren breven, also dat jowelic closter uns gheve alle jare ver marc to sinte Galle daghe. Dit ghelt ne mach he nicht binnen twen jaren wederkopen. Na den tven jaren so schal he alle jare twintich marc gheldis wederkopen umme tveyhundert marc to aller manne Vastnachten, unde so scolle we weder antworden breve van vif closteren, sowelkere we willet, de kore steyt an os. Wel oc os jenich man vorclaghen, deme scholle we antworden vor unseme herren deme biscope unde nicht vor deme godinghe noch vor deme lande. Ute disseme kope neme we oc den Stenberch unde achte hove to Oldendorpe mit den worden, de dar to horen. So wat we aver eghenes hebbet in der grafscop vorleghen, dar scal os unse herre mede belenen, unde mit dissen kerclenen tven, to Dasle unde to Mackenhusen. Unde storve we oc ane erven, so scholden de kerclen unses herren unde siner nakomelinghe los wesen, unde de man scholde an se volghen. Unse herre scal oc os eynen hof lenen to ervenborchlene mit teyn marc gheldis unde dit gud darto, dat ganze dorp to Robbedissen mit alleme rechte, eynen verding unde dre marc gheldis to Holthusen in deme Broke, two marc gheldis in sowelkere vestene we dat borchlen kesen welden in disser grafscop. Ne mochte we dene hof silve nicht besitten, so moste we wol darin setten sowene we welden. Vorkofte we oc ene eyneme bederven manne eder unseme vrunde, we de were, deme scolde unse herre ene lenen to deme silven rechte. So war we oc koften tvelf hove in der grafscop de van os ghinghen, dar scholde unse herre unde sin capittel2 uns den eghendom over gheven. Disse grafscop scholle we lenen unses herren mannen soweme he se hebben wel unde to gude holden also langhe, went he de le[ni]nghe erkrighe van deme rike. De vorsprokenen dorp unde alle ander gud, dat we utghesat hebbet, scal unseme herren unde sinen nakomelinghen to der silven losinghe unde to deme silven rechte stan, dat et os to stunt. Worde oc os wat gudes ledich eder kofte we et, dat man et os uplete, dat mochte we wol besetten mit unses herren mannen, dat en scolde man os nicht hinderen, und de wile dat se dar uppe seten, so ne scolde man se nichtes bidden. Unse herre scal oc [os] helpen beherden unse jaghet in deme Solinghen unde scal os staden, dat we vischen laten in sineme watere. He ne scal oc nene un[se] viande to sec laden noch to borgheren untfan, he ne helpe os van en erst minne eder rechtis. Disse redhe scal man os also vorwissenen, dat unsen vrunden broder Borcharde van Barboy, d[eken Henr]ike van Hildenseym, provest Otten van dem Berghe unde greven Henrike van Reghensteyn [dunke des,] dat we wis ghenoch sin. To ey[ne]me orkunde alle disser dinghe so hebbe we dissen bref ghetekenet mit unseme ingh[ese]ghele. Disse bref is oc ghegheven na goddes bort Dusent unde drehundert jar in dem[e] thegheden jare, des sundaghes wanne men seghet Alleluia. ||
||
1 Über der Zeile korrigiert zu -e-.||
2 Zweites -t- über der Zeile nachgetragen.