Von Gots Gnaden wir Heinrich der jünger, Hertzog zu Brunsweig und Lüneburg etc., zeligen Hertzogen Heinrich Sone, bekennen offenbare in disem Brieff vor uns, unser Erben und allermeniglich, das wir den erbarn unsern lieben getreuen Ditterichen von Germerssen unnd seines Leibs menliche Lehenserben zu einem rechten erblichen Manlehen belehnet haben und belehnen gegenwurtigklich in kraft und macht dis Brieffs, nemlichen mit achte Hufe Landes, fünff Kothöfen und der Kornmolen zu Germersen, mit sechs Hufe Landes und einem Satelhofe zu Garboldessen, mit dreyen Vierteln an dem Zehenden zu Woldersem, mit dem halben Zehenden zu Voltagessen, mit drey Hufe Landes, einem Satelhofe und sechs Kothöfen zu Wentenssen, mit dreyen Hufen zu Holthusen gelegen bey Huldessen, mit nheun Hufe Landes uff dem Velde zu Bensen und Rennsen, mit einer Hufe Landes zu Rotgodessen, mit dreyen Vierteln an dem Zehenden zu Avenshusenn und dreyen Hufe Landes darselbst, mit nheun Morgen Landes uff dem Velde zu Garboldessen und mit einer Worth zu Veldtperge und mit aller diser vorgeschribner Gueter Zubehorungen, Nutzen, Zinsen, Diensten, Pflichten und Gerechtigkeiten in Holtz, Dorffern, Velden, Wassern, Wiesen und Weide, nichts darvon ausbescheiden, in aller Massen, als seine Vorfahren dieselben Gueter zuvorn von dem Stifte Hildensheim zu Lehen gehapt haben. Wir wollen auch gedachten Ditterichs von Germerssen solcher Lehengueter bekenniger Herre und Where sein, so oft ime das vonnöten und an uns gesunnen wirt, sonder Argliste und Geverde. Zu Urkhund haben wir unser furstlich Insigel an disen Brieff wissentlich heissen hengen, der gegeben ist nach Cristi unsers lieben Hern Gepurt Tusent funffhundert und im sechsunddreissigsten Jare, dornstags nach Galli Abbatis. ||
||
[Kanzleivermerk:] J Hamstett ssst.