Wir Friderich von Gotts Gnaden confirmirter und bestettigter zu Bischoff zu Hildesheim, Erbe zu Norwegen, Hertzogk zu Schleswigk-Holstein, Stormarn und der Dittmerschen, Graff zu Oldenburgk und Delmenhorst, bekennen mitt diesem unsrem öffen Brieff fur uns, unser Nachkhomen ahm Stifft Hildesheim und sonsten idermennichlichen, das wyr den erbarn unsren lieben Getruwen Aschen vom Kramme, Ehrn Aschen seligen Son, mitt allen und jeden hiernach bemelten Guethern zum Erbschenckampt unsers Stiffts Hilldesheim gehorende, ihn Masen sein Vater und Voreltern selige dey von unsern Vorfarn unnd Stifft zu Lehen getragen, als nemblich mit eynem freyen Eddelmanshoeff mitt elffen Hove Landes, eynen halben Zehenden, eyner Muelen, eyner Schefferey, Deichen und zwelff Kothoffen bynnen und auserhalb des Dorpfs Dinckelbeke, item mitt eynem Borklehen zur Finenborch, einem Hoffe uf der Warpe und dren Hoven Landes uf dem Felde daselbst, eyner Huttenstede zwischen der Dorffstede Kulingen und der Eckern, alles ihm Gerichte Finenborch, mitt eynem frien Waserganck sampt aller Zubehorungen, item mitt eynem Hoffe und vier Hove Landes zu Wolde, ein Hoff und drye Hove Landes zu Grosen Gysen ihm Gerichte Sturwolde, funff Huefe Landes tzu Harrickhusen, eyn Hoff zu Ochtersen, sechs Hueffe Landes sampt eynem Meygerhoff tzu Iltten, eyne halve Hufe Landes und eynen Hoff tzu Lottingsen, eynen halven Tzehenden, vier Hofe Landes und vier Hofe tzu Veltberge, niegen Hove Landes und eyn Hoff und tzwe Hovethe in dem Rise tzu Berle, eyn Huefe Landes und eynen Hoff tzu Himbstede, eyne halve Huefe Landes und eyn Hoff tzu Solde, drie Hueffe Landes tzu Haddesen odder Huddessen, viff Huefe Landes und eyn Hoff tzu Achtem, eyn Hueffe Landes tzu Uppem, eynen Hoff tzu Himmesdor, eyne Wische tzu Armberge, sechs Huefe Landes tzegentfrey und eyn Hoff sampt eynen Moelenhoff tzu Grosen Forste, drie Huefe Landes und eyn Hoff tzu Dingeweke, funff Hueffe Landes und funff Koitthoffe tzu Grosen Lopke, drie Huefe Landes tzu Ummelem, eyne Mule und tzwe Huefe Landes sampt eynem Hoffe tzu Nettlingen, sechs Huefe Landes tzu Seinde, tzwe Huefe Landes tzu Lunde, eynen Hoff tzu Wetzen, eynen Hoff tzu Ingelem, eyne halve Huefe Landes tzu Heisede, eyne halfe Huefe Landes tzu Goringe, eynen Hoff tzu Eymercke, drie Kotthofe und vier Wische tzu Gravestorpe ihm Gerichte Koldinge, eyn Huefe Landes und eynen Hoff tzu Dodesen, und eyne halve Huefe Landes ahm Schledeberge, eyne Huefe Landes tzu Ayen, tzwe Hueffe Landes tzu Hoensen, eyn Hoff tzu Nienstede und de Hove heth de Vorsthine, drie Hoffe Landes und eyn Hoff tzu Beuvelte, eyn Hueffe Landes und eyn Hoff tzu Hildesheim, eyn Hoff tzu Bruggem, vier Schilling ahn dem Fronentzins tzu Hildesheim, XXV Schilling ahn dem Fronentzins tzu Hildesheim, noch eyn Schilling ahn dem Fronentzins tzu Hildesheim, noch niegen Schilling ahn dem Fronentzins tzu Hildesheim, noch VIII Schilling ahn dem Fronentzins tzu Hildesheim, noch funff Schilling ahn dem Fronentzins tzu Hildesheim, noch eyn Schilling ahn dem Fronentzins tzu Hildesheim, eyn Hoff und sechs Heuser darbey belegen ihn der Borchstrasen tzu Hildesheim, noch eyn Haus ihn der Borchstrasen tzu Hildesheim, noch eyn Haus tzu Hildesheim bey Luder Breyman, sechs Heuser uff dem Oldenmercktt tzu Hildesheim und eyn Haus, do Ludeke Osede inne wonth, und vorth die Rege all aus bis ahn des Kellners Hoff, item Tzins an eynem Hause ihn dem Brule, do eynen Andres Synder woneth, eyn Haus ihn der Elckermeckerstrasen tzu Hildesheim gegen der Freylen, item was von Heusern stehett tzwischen des Kelners Hoff und Hans Reyneken Hause bey der Borchstrassen her, tzwe Heuser in der Elckermeckerstrasen tzu Hildesheim, tzu eynem rechten Erbmanlehen fur ihnen und seyne menliche Leibs-Lehenserben gnediglichen vorliehen haben, geliehen ihnen und seyne menliche Leibs-Lehnserben, auch mitt allen und jheden obgemelten Guethern hiemitt jegenwortigen wey Lehnsrecht, -artt, -natur und -eygenschafft ist, das ehr und seyne Man-Leibs-Lehnserben solche Guether wey frey, rittermesigk Lehnguett, ihn masen seyn Vatter seliger und Voreltern solchs gebrauchtt und von unsrem Stifft zu Lehen gehabtt, besitzen, gebrauchen und geniesen muegen mitt aller und jeder Gerechtigkeitt und Zubehorung. Und wyr und unsre Nachkhomen sollen und wollen ihme und seynen menlichen Leibs-Lehnserben ihre rechte bekenniger Her und Wherer sein, ihnen und seyne menliche Leibs-Lehnserben auch dabey gnediglich schutzen und handthaben, so offt solchs ihnen vonnothen sein wirth und wir von ihnen erfurdert werden, idoch uns und unsrem Stifft und sonsten menniglichen ahn seynem Rechten unschetlich, daentkegen er uns auch ihn Truwen gelobtt, unser truwe Man tzu sein, unser und unsers Stifft Best zu wisen und alles das zu thun und zu lasen, das eynem truwen Lehenmhan tzu thun eygent und gepurtt, alles getrulich und ungeferlich, und haben des ihn Urkundtt unser furstlich Secrett hey unden wisentlich hengen lasen, datum uff uff [!] unsrem Haus Sturwoldtt, den ersten Tagk Novembris Anno nach Christi unsers lieben Hern Geburtt Thausent funffhundertt und ihm funffundfunfftzigsten etc. ||
||
[Kanzleivermerk:] manu propria Lucas Molner ssst.