Wir von Gottes Gnaden Heinrich der Jünger, Hertzog zu Braunschweig und Lüneburg p., bekennen in diesem unnserm offen Briefe für uns, unsere Erben und jedermenniglich, das wir den erbarn unnsern lieben Getrewen Heinrichen von Velthem alß den Eltesten mit Zubehuef Fritzens, Ludwigen, aber Ludwigen unnd Jobsten, Gebrüder unnd Vettern von Veltem, und in ein Samptlehen Hening und Christoff von Bortfelt, Aschen seligen Sone, auch Giesen, Heinrichs seligen Sone, Ludolffen, Werner, Friederich und Heinrich, Friederichs seligen Sohnen, alle Gebrüder unnd Gevettern von Bortfelt, wie Erbmanlehensrecht unnd -gewonheit ist, mit nachbeschriebenen Güthern belehnet haben und belehnen ihne gegenwerttiglich in Krafft und Urkundt dieses Brieffs, nemblich mit acht Huefen Landts zu Bokenem, der eine geheissen ist die Gülden Hufe, vier Wischblecke, sieben Scheunstedte in der Stadt, und dem Satelhofe, zwo Hausstette und zwen Höfe vor dem Steinthor in der Stadt, zweiunddreissig Garten vor Bockenem, zu Ortzhausen drei Huefen Landts und den Zehenden uber sieben Huefen Landts, zwen Kothofe in unserm freyen Borchmanßhoff mit allem Borchmansrecht, und den Zehenden uber neun Kothofe, ein Wische und ein Holtzbleck in dem Holtze darselbst zu Ortzhausen, fünff Huefen Landts, drei Kothofe unnd ein Holtzbleck in dem Packenhuser Holtz und Velde zu Zeunigen, vier Huefen Landts und einen Kothoff, den dritten Theil des Zehenden unnd den dritten Theil des Gerichts bei dem Dalemer Berge zum Hagen, zu Rüden zwanzig Morgen Landts, zwen Kothofe unnd ein Wische, zu Gither ein Huefe Landts, zwei Kothofe die sein zehentfrei, zu Lütken Heere ein halbe Huefe Landts, zu Gronstede ein halbe Huefe Landts, zu Nawen ein Huefen Landts, zu Boningen zwen Kothofe und ein Vierling Landts und zu Holle einen Kothoff sambt allen andern Güthern und ir aller Zubehörungen, in Massen vor Zeiten die Trobben das alles vom Stiffte zu Hildeßheim zu Lehne gehabt haben, nichts außbescheiden, wollen auch solcher obgeschriebener Lehengüter sein bekenniger Herr unnd Were sein, ine darbei schützen, schirmen und verthedingen, so offt unnd dicke das von uns gesucht und wir in Recht zu thun schuldig sein, alles getrewlich, sonnder Argelist unnd Geverde. Zu Urkundt haben wir unser fürstlich Insiegel an diesen Brieff wissentlich heissen hengen, der geben ist zu Wolffenbüttel nach Christi unnsers lieben Herrn Geburt Tausent fünfhundert und im fünffundsechtzigisten Jare, mitwochs den achten Augusti. ||
||
[Kanzleivermerk:] J. Münsinger Frundeck Cantzler p. sst.