Wy Hinrik unde Ludeke broydere gheheten de Hovelinghe bekennen openbar in dessem breve vor uns unde unse erven, dat wy myd samder hand hebbed vorkofft unde vorkoped in krafft desses breves vor achtentich ghude vulwichtighe rinsche ghulden twe hove landes belegen uppe deme velde to Heysede myd aller slachten nud unde tobehoringhe, alse darto hored unde dat benomen mach, Lodewiche Gosberghe, borghere to Hildensem, unde sinen erven eder deme, de dessen breff hefft myd orem willen, unde wy erbenomde Hinrik unde Ludeke hebbed deme vorbenomden Lodewiche, sinen erven unde oren medebenomden de vorschreven goyde gheantwordet unde antworden in ore upnemende hebbende brukende were, so dat se moghen unde schullen rauwelken darvan upnemen alle, wes darvan jenicherleyewys vallen unde werden mach, sunder unser jenigherleye weddersprake unde jemendes van unser weghen. Aver wy vorbenomde Hinrik unde Ludeke hebbed uns unde unsen erven de macht unde wilkor allene beholden, dat wy eder unse erven deme erbenomden Lodewiche unde sinen erven unde medebenomden de vorschreven goyde allejarlikes moghen wedder affkopen vor de ergenante summen gholdes, unde welkes yares wy eder unse erven dat don wolden, dat scholde wy unde wolden one vorkundighen twyschen Wynachten unde Lechtmissen, unde denne to deme neysten tokomenden Paschen darna, so were wy vorbenomde Hinrik unde Ludeke eder unse erven de vorscrevenen goyde van deme benomden Lodewiche, sinen erven unde medebenomden vor de ergenante summen goldes plichtich wedder afftokopende sunder hinder unde vortoch. Dyt love wy Hinrik unde Ludeke vorbenomd myd samder hand vor uns unde unse erven deme erbenomden Lodewiche unde sinen erven unde deme hebber desses breves alse vorschreven is in ghuden truwen stede unde vast to holdende sunder alle lyst, unde hebbed desses to bekantnisse unse inghesegele henged an dessen breff, unde wy Magnus van godes gnaden byschop to Hildensem bekennen in dessem sulven breve vor uns unde unse nakomelinghe, dat desse vorschrevene kop gheschen is myd unsem ghuden willen, wytschop unde vulborde, unde wy sind deme vorbenomden Lodewiche, sinen erven unde medebenomden der erbenomden achtentich ghulden bekennich an deme vorscrevenen gude, wered, dat uns dat sulve ghud vorledeghede, so enschulle wy eder unse nakomelinghe noch enwilled de genanten goyde nemende lenen unde sulven nicht anemathen noch sek der nemende anemathen laten nenewys, deme erbenomden Lodewiche, sinen erven unde oren medebenomden enwere ersten ore vorscrevene summe goldes to danke wol betaled in aller wyse, alse vorscreven is, unde hebbed desses to bekantnisse unse inghesegel tovoren ghehenged heten an dessen breff, na godes bord Verteynhundert jar darna in deme vertigesten jare, des mydwekens vor Cathedra Petri.