Wir Johannes Abtt, Johannes Prior und gantze Convent des Closters Sancti Michaelis in Hildensheim Ordinis Sancti Benedicti vor uns, unser Stifft und Nachkhomen, auch sonsten jegen allermenniglichen thun kundt unnd offentlich bekennen, das wir dem bescheden und namhafften Cramer Krubben, seinen Erben, Erbnemen ader dem getreuwen Innehaber dieses Breives mit seinem effte ihrem guten Wissen und Willen rechter, warer, wissentlicher, offenbarer und bekandtlicher Schuldt schuldich unnd pflichtig sein einhunderttunndsechtzig Gulden Muntz, jhe zwantzig Marriengroschenn auf jedenn Gulden zu rechnen, so ehr uns und unserem Closter gudtwilliglichen vorgestregkett unnd geliehentt unnd wir dieselbigen vonn ihme in einer barenn, ubergetzaltenn Summen aufgehobenn und empfangen, dieselbigen auch alsofordt in unsers Closters scheinbarlichen Nutz, Fromen unnd Bestes gekardt unnd angewandt habenn. Sodane einhunderttundsechtzig Gulden Muntz Heubttsumma willen wir und unsere Nachkhomen schullen gemeltem Cramer Krubben und seinenn Mitbeschrieben jerlichs mit achte Gulden Muntz auf Osteren vortzinsen. Wir haben uns aber vonn beiden Theilen die Gewaldt und Macht vorbehalten, das einer dem anderenn, welcherem Parthe das beliebett, auf die gedachten Heubttsumma allejerliches in denn vier heiligen Dagenn zu Winachten eine schrifftliche ader mundtliche Lose mach kundigen, unnd wen die geschehenn, willen wir und unsere Nachkhomen schullen dem gemeltenn Cramer Krubben unnd seinenn Mitbenombten auf den folgenden Osteren der Losekundigunge allererst folgende sodane sodane [sic] hundertundsechtzig Guldenn Muntz mit achte Guldenn Muntze Zinses, auch allenn hinderstelligenn Zinsenn, ob der welche hinter pliebenn, unbehindert und und [sic] unbekummerdt alles geistlichenn unnd weltlichenn Gerichts effte Rechtes gutlichen und woll zu dangke in der Altennstadt Hildensheim widerumb entrichtenn, vornugenn, vornugenn [sic] und betzalenn, List unnd alle Geferde hirinnen ausgeschlossen. Des zu ferner Orkundt haben wir vor uns, unser Closter unnd Nachkhomen unser Ebtie und Convents Ingesiegele wissentlichen ahn diesenn Breif lassen hengen, gegebenn nach Christi unsers Heren und Salichmachers Geburdt im Funfzehenhunderstenn dreyunndsiebenzigesten Jhare, des mondages in denn heiligen Osterenn.||