Wir Johannes Abtt, Casparus Prior undt gantze Convent des Closters Sancti Michaelis in Hildenßheim vor uns, unser Closter undt Nachkohmen, auch sunsten jegen allermenniglichen thun kundt unndt offentlich bekennen, das wir dem erbaren unndt bescheiden Bartoldt Müller, Bürgern zu Pattensen, seinen Erben, Erbnehmen ader dem getreuwen Innehaber dieses Brieves mitt seinem effte ihrem guten Wissen unndt Willen rechter, wahrer, wissentlicher, offenbahrer unndt bekandtlicher Schuldt schuldich undt pflichtig wurden sein sechshundertt wolgeldende, unvorbodene undt unvorschlagene Reichsthaler, gudt von Schlage unndt Gewehre, die hei unß in unsern Nothen guttwilliglichen vorgestreckett unndt gelehnett, die wir auch von ihme tzu fuller Genüge uffgeburdt unndt empfangen unndt in unsers Closters scheinbarlichenn Nutz, Fromen undt Bestes undt sunderlich tzu Wedderablosunge der sechshundertt Thaler, die unß Reinhartt Stromeiger seliger geliehentt unndt vorgestreckett undt wir Bischopff Burchardt loblicher Gedechtenisse hiebevornn geliehentt, wissentlich gekardt unndt angewandt habenn. Vor solche Summa sechshundertt gutte wolgeldende, unvorbodene unndt unvorschlagene Reichsthaler haben wir vor uns unndt unsere Nachkohmen obgemeltem Bartoldt Moller, seinen Erben unndt Mittbeschrieben unsers Closters drei Hube Landeß vor Pattensen belegen, die ehr von unß meigersweise inne hadt mitt aller Gerechtigkeitt unndt Tzubehorunge unndt jerliches zwolff Molter Roggen, fünff Malter Garsten unndt zwolff Molter Haveren uns davon zinsett, alles reine unstraffbar Koren unser Klostermasse, uff einen Wedderkauff vorkaufft haben unndt vorkouffen jegenwertigen in unndt mitt Crafft dieses Brieves also unndt diesergestaltt, das bemelter Bartoldt Müller, seine Erben unndt Mittbeschrieben die gemelten jerigen Kornnzinse von den dreien Huben Landes inne behaltenn sollen unndt mügen ahne unser unndt unserer Nachkohmen jennige Insage unndt Vorhinderunge. Wir haben aber unss beiderseitts, ein jeder vor sich unndt seine Mittbeschrieben, denn Gunst bedingett unndt Machtt vorbeholden, das ein Theill dem anderm, weme dieser Kauff nit lenger beliebett, in den vier heiligen Dagen tzu Weinachten eine schrifftliche Losekündigunge thun mügen. Unndt wen die Lose dermassen von einem Theile also geschehen, alßdan willen wir unndt unsere Nachkohmen schullen obbemeltem Bartoldt Müller, seinen Erben unndt Mittbeschrieben obberürte sechshundertt gutte, wolgeldende, unvorbodene unndt unvorschlagene Reichsthaler in einer baren Summen binnen Hildenßheimb in unserm Closter in den negestkhomenden vier heiligen Dagen zu Ostern der Losekündigunge allererst folgende neben allem erlitten unndt beweißlichen Schaden unndt Interesse unbehindertt unndt unbekümmertt alles geistlichen unndt welttlichen Gerichtts unndt Rechtts sunder alle Insage, Exception, Behelff, List unndt Geferde guttlichen unndt woll tzu dancke entrichten, vornügen unndt betzhalen, unndt die Zinse wedderumb ahn unß undt unser Closter tzu nehmende. Alle vorgerürten Punctt unndt Artikell dieses Brieves undt einen jeden insunder reden unndt loben wir Johannes Abtt, Casparus Prior unndt gantze Convent deß Closters Sancti Michaelis obgenandt vor unß unndt unsere Nachkhomenn dem gemelten Bartoldt Müller, seinen Erben unndt Mittbeschrieben bei unseren Ehren, Wirden, Treuwen, wahren Wortten unndt guten Glauben stedevest unndt unvorbrochen woll tzu halten, getreuwlig unndt ahne einig Geferde. Des tzu Urkundt der Warheitt haben wir unser Ebtie unndt Convents Ingesegele wissentlichen ahn diesen Brieff lassen hengen, gegeben nach Christi unsers lieben Heren unndt Salichmachers Geburdt im Fünfftzehenhundersten zweiundtneuntzigsten Jhare, des montags in den heiligen Osternn.||