Unse demodige gebedt und frundtwillige ehrendenst thovoren, wol erwerdige in godt andechtige hochgeehrte here abt und insunders grodtghunstige Patron. Wi hebben mit sunderliken frouwden erfaren, dat ewre wol erwerden ehr closter, dar uth se nu vor etliken jaren vordreven ghewesen, werden wedder in bekamen, darvor dem leven godt hochlick tho dancken, und wunschen ewer wol erwerden tho sulcker recupererung godts segen und alle wolfardt. So hebbe wi ock mitnichten vorgheten der groten woldaet, so uns van ewer wol erwerd bewisen, alß se uns in hogesten noeden und uthersten ghefar der catholischen religion na unsem instendigen demodigem bidtlikem anholdende einen prester tho geschicket, alß den erwerdigen heren patrem priorem juwes closters, welckes wen nicht geschen were, mochte disse disse orth und congregation vorlengst den uncatholischen tho dele gheworden sin, also dat wi ewre wol erwerden negest godt vor catholische religion und closterliker disciplin disses orts erholter mit erkennen, werden ock sulcke favor, gnade und hogeste woldaet, so uns hyr in erthoget, nummer in vorgheten stellen, und godt der almechtige belone id ewer wol erwerden mit ewiger vorghelting. Alß wi den nu mit dem sulven prester, so uns domaln geschicket, wol thofreden sint, dewile he sinem berop und stande na unstraflick mit gotsdenste, lehr und predigen flitich nalevet, bidden derhalven, ewre wol erwerden wolde densulven hyr bi uns vorbliven laten ahne affordering, tho vorhoding jeniger gefar der gheweten, welck wi in afwesend der catholischen prester leygder mehr alß tho vele mit groten schmerten hebben erfaren, leven nu ghanßlick der trostliken hopening, ewer wol erwerden werden in disser gestliken und christliken sake unseren instendigen und hochflitigen bidden platz gheven, de wi gots gnedigen schutz und uns in dessen f bestendigen favor demodigest dohn bevelen. Datum Nygenkloster, den 11. decembris anno 1642. ||
Catherina Ruters, domina, und vorsamling darsulvest.||