Wy Hermen abbet, Otto prior unde gantze convent des closters to sunte Michaele bynnen Hildensem sunte Benedicti ordens bekennen openbar in dussem breve vor uns, unse nakomen unde vor alsweme, dat wi van dem werdigen heren Bertram Soltman hebben entfangen unde upgebort twehundert lutke punt, so tho Hildensem ghinge unde gheve sint, de wi vorder in unses closters ghemenen fromen unde nud hebben ghekart. Hirvor hefft de vorgescrevene here Bertram Soldman bi uns gekofft achte punt iarlikes tinses tho twen tiden ome to ghevende alse veer punt up Michaelis unde veer punt up Passchen, de wi ome, sinen testamentarien edder holder dusses breves mit sinem guden willen alle yar beredeliken gheven unde betalen schullen tho tiden alse vor berort is sunder argelist. Doch so hebbe wi uns unde unsen nakomen de macht beholden, dat wi sodane achte lutke punt alle yar wedder mogen affkoepen, unde wenn wi dat don willen, scholde wi dussem vorbenomten her Bertram Soltman, sinen testamentarien edder holder dusses breves mit sinem guden willen eyn verndel yars thovoren de lose vorkundigen unde denne dar na up Michaelis edder Passchen erstvolgende dusse vorbenomden twehundert lutke punt ome edder sinen medebenomden weddergheven mit bedagedem tynse unde ock mit vorsetenem tinse, ifft des wes nastunde, woll tor noege unde tho dancke betalen ane yennige bekummernisse gheistlikes offte wertlikes gherichtes unde rechtes. Unde wenn sodanes is gescheen, synne wy nemande meer van syner wegen wes plichtich van sodanen tinsen tho antwordende, unde dusse breff schal denne syn machtlos unde unbindende. Dusses tho merer wissenheit unde orkunde hebbe wi vorbenomde abbet, prior unde convent unser ebbdie unde conventes ingesegele witliken an dussen breff gehenget, unde is geschen na Christi gebort Veffteynhundert in dem dreundetwintigesten jare, Decem Milium Martirum.||