Heinricus dei gratia Hildensemensis episcopus omnibus fidelibus hanc litteram inspicientibus gratiam in presenti et gloriam in futuro. Quoniam malicia conditionis humane ad malum prona est pocius quod ad bonum, idcirco ea, que salubriter acta sunt et bene, ut in futurum non aliqua malignitate valeant retractari, et testium debent munimine et scripti testimonio confirmari. Hinc est, quod cum dilecti nobis in Christo dominus Godescalcus venerabilis abbas et conventus monasterii sancti Michahelis ordinis sancti Benedicti Hildensemensis a Nandwico de Wulvinge et fratre suo Gerardo de Gandershem et Juthta sorore ipsorum necnon Adhelheide uxore predicti Nandwici tres mansos in Essem ab omni advocatie potestate solutos cum universis iuribus, que eisdem bonis in aquis, campis, pratis et nemoribus attinere noscuntur, nonaginta talentis Hildensemensium denariorum de nostro consensu et beneplacitu comparassent, prefati Nandwicus et Gerardus fratres et soror eorum Juttha et Adelheidis uxor Nandwici eosdem tres mansos, quos a nobis in feudo tenuerunt, in manus nostras liberaliter resignarunt. Nos igitur, sicut sincerius loca religiosa diligimus, ita libentius super hiis, que ad ipsorum profectum respiciunt, favorem eis benivolum impertimur et quia predictos abbatem videlicet et monasterium sancti Michahelis meritis suis exigentibus specialis dilectionis privilegio amplexamur, securitati atque utilitati sacri collegii providere volentes, supradicta bona, que nobis ex predictorum resignatione vacabant, ob remedium peccatorum nostrorum contulimus monasterio sepedicto, volentes, ut simus participes omnium orationum et bonorum operum, que ibidem fuerunt auctore domino procurata. Ut itaque ex nulla temporum longinquitate aut hominum malicia huic donationi nostre possit impedimentum aliquod provenire, eam presenti scripto et sigilli nostri munimine roboramus, mandantes eam sub interminatione anathematis perpetuis temporibus inviolabiliter esse ratam. Testes huius rei sunt Hartmannus de Minda, Theodericus de Appolde, Sigebode de Scartvelde, Volradus de Goslaria, Johannes domini Volcmari, canonici nostri, comes Widekinnus, Rodolphus de Dalem, Luppoldus de Escherte, Ekbertus Camerarius, Ekbertus Niger, Hermannus de Stempne, Hermannus Bok de Wulvinge, Bertoldus Pil, Heinricus de Lapideo Monte, Hermannus Hoye, Lippoldus et Theodericus de Stockem fratres, Walterus de Bervelthe, ministeriales nostri, Sifridus Mortificator, Hildebrandus Seneca, Albertus et Heinricus fratres Burmester, Johannes de Asle et filii sui Johannes et Heinricus, et Gerardus Camerarius, burgenses nostri, et alii quam plures. Actum Hildensem in curia quondam prepositi Johannis Marci in domino defuncti, anno domini M°CC°LIII°, IIII° idus januarii, pontificatus nostri anno sexto, indictione quintadecima.||