Wy her Diderik abbet des stichtes to sunte Mychele bynnen Hildensem bekennen openbare in dussem breve vor allen, de on seen unde horen lesen, dat ichteswanne twidracht unde krych was vor dem erbaren heren hern Reynerde, deken der kerken to sunte Ciriacus buten der muren to Brunswik, unsem richtere van des stols to Rome wegen, twischen Henninge, Hermanne, Hanse unde Bertolde geheten de Hampen up ene syd, unde Bernt Hermens wonaftich in dem dorpe to Ingeleve up de ander syd, also umme veer hove landes belegen up dem velde des vorgescreven dorpes to Ingeleve, de unsem stichte eghen synt mit allem rechte, doch weren de sulven Hampen fente unde Bernt Hermens schelaftich also umme de meyerscop der sulven hove, dar wy se umme in gerichte togen vor den vorgescreven hern Reynerde dekene unde ok ander lude, de an de sulven hoven spreken. Doch de sulve Bernt Hermens al de wyle he dat gud buwet heft alle jar unsen stichte unde vormunde den tyns unde pacht, de sik van den hoven bort, genstliken betalt heft unde geven. Doch an dem jare alsome screff dusent unde veerhundert seventegeden jare, so hebbet sik de sulven Henningh, Herman, Hans unde Bertold Hampen mit Bernde Hermens, de do dat gud in meygerswise hadde, in jegenwardicheit der erscreven hern Reyners deken und richter unde unser vorstender, de wy darto sand hadden, umme alle schelinge vruntliken berichtet, unde wy hebben de sulven Hampen fente in meygerswise unde ander nicht vor besteden tyns unde pacht jarliker gulde to dem sulven gude stadet, unde Bernt Hermens de meygerscop der veer hoffe genstliken vorlaten hefft unde syk na der tiid nicht inworen hefft unde up dusse fruntlike schedinge worden und synt allerleyge kryge, unwille, de twisschen on was, to ewelken tyden vruntliken berichtet. Hir over synt gewest to tuchnisse de geysliken heren Bertold Begel, abbet to Luttere, her Bernt Valleberch, canonik up sunte Ciriacus berge, Ludolfus Rikesslach, viccarius dar sulves, Hans Bensleve, ratman to Brunswik. Des to bekantnisse unde vullekomen betuchnisse so hebbe wy her Dyderik dussen breff bezegelt mit unsem ingesegele, de geven is na goddes bort Dusent unde verhundert jar in dem seventegeden jare, in sunte Jacobes dage des hilgen Apostels.||