Otto dei gratia prepositus et archidiaconus, Wolferamus decanus totumque cappitulum^a ecclesie Salzburgensis dilectis in Christo | fratribus Walthario abbati totique conventui in Reitenhaselach^b Cisterciensis ordinis fraternam in domino karitatem. Quociens a nobis petitur, quod iustum est et consonum rationi, benivolum prebere debemus assensum, maxime circa illa, ubi religiosorum quies intenditur et utilitas procuratur. Cum ergo dominus et pater noster pie memorie venerabilis Eberhardus secundus Salzburgensis archiepiscopus, apostolice sedis legatus, utilitati vestre consulens et quieti, qui die noctuque in vigiliis et orationibus et ieiuniis frequentibus dominum pro sua ecclesia exoratis iuxta vestri ordinis decenciam et rigorem, ecclesiam parrochialem in Perchirche^c sitam inter Muldorf^d et fluvium, qui dicitur Rot, cum iuribus suis et pertinenciis contulerit pleno iure in subsidium vestri deffectusa pro remedio anime sue et predecessorum necnon et successorum suorum, ita quod ibi instituto provido sacerdote secundum continentiam privilegii super hoc vobis traditi divinum ibi officium exsolvatur, nos igitur vestris precibus inclinati, quia devoti nobis existitis et existere credimus in futurum, donacioni vobis per predictum dominum nostrum facte liberaliter consentimus eamque presenti scripto duximus adprobandam. Et ne super hoc vobis in futurum questio moveatur, presens instrumentum vobis dedimus sigilli nostri munimine roboratum. Dat. huius apud Salzburch anno domini M^o. CC^o. XLVI^o, IIII kal. ian., Vo indictionis.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 173, S. 148-149