Urbanus episcopus servus servorum dei dilecto filio . . preposito ecclesie Salzeburgensis salutem et apostolicam benedictionem. Ad audientiam nostram pervenit, quod tam l dilecti filii . . abbas et conventus monasterii sancte Marie in Reytenhaslach^a Cisterciensis ordinis Salzeburgensis diocesis quam predecessores eorum terras, decimas, possessiones, redditus, iura, iurisdictiones et quedam^b alia bona ipsius monasterii nonnullis clericis et laicis, aliquibus eorum ad vitam, quibusdam vero ad non modicum tempus et aliis perpetuo, ad firmum^c et sub censu et etiam sine censu, datis super hoc litteris, penis adiectis, factis renuntiationibus et iuramentis interpositis in enormem lesionem eiusdem monasterii concesserunt, quorum aliqui dicuntur super hiis a sede apostolica confirmationis litteras impetrasse. Quia igitur nostra interest lesis monasteriis subvenire, discretioni tue per apostolica scripta mandamus, quatinus ea, que de bonis eiusdem monasterii alienata inveneris illicite vel distracta, ad ius et proprietatem ipsius non obstantibus litteris, penis, renuntiationibus, iuramentis et confirmationibus supradictis studeas legitime revocare, contradictores per censuram ecclesiasticam appellatione postposita compescendo, testes autem, qui fuerint nominati, si se gratia, odio vel timore subtraxerint, censura simili appellatione cessante compellas veritati testimonium perhibere. Dat. apud Vrbem veterem V idus maii, pontificatus nostri anno tertio.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 271, S. 216-217