Convenit gestis hominum roborandis, ut scripturarum serie necnon fidelium testimonio debeant solidari, ne | prorogatione temporis aut invidorum malicia calumpniam in posterum paciantur. Nos ergo Ortolfus dictus de Stæringen^a omnem preiudicii maculam desiderantes fideliter precavere testimonio presencium cunctis Christi fidelibus patefacimus profitendo, quod totam decimam, quesitam et non quesitam, supra et inferius in Weilhardo^b, quam dominus Heinricus miles dictus de Wolfsperch^c a nobis hucusque iure tenuit feodali, ab eodem accepimus voluntarie resignatam tali ex parte ipsius peticionis preambula pactione, videlicet quod memoratam decimam pro perpetua conservacione monasterii sancte Marie in Raitenhaslach^d familie domini Chv^onradi venerabilis abbatis dicti loci conferre teneremur tytulo feodali, servis scilicet subnotatis Friderico dicto Chrispelsteter necnon filio eiusdem Chvnrado, item Dietmaro de Hegler^e, Heinrico mariscalco et Vlrico coco suo. Quod et fecimus plena fide, cautelam nichilominus aliam sepedicto cenobio inserentes, scilicet quod famuli nominati de consensu et donatione manus nostre prehabitam decimam domino abbati et suo conventui pro sexaginta libris Ratisponensium obligarunt. Sane quoque memorie commendandum, quod non solum constrinximus nos, immo etiam heredes nostros tutores, quod vulgariter dicitur gwer, existere sepedicte decime decem annis et uno die contra omnem inpetentem personam pro loco et tempore, sicut ab eodem tunc collegio fuerimus requisiti. Promisimus insuper pro investienda domo sua hanc decimam nos resignaturos reverendo domino archiepiscopo Salzburgensi tempore, quo ipsis visum fuerit utiliter expedire^f. Adicientes etiam, quod, quamcumque formam secum conceperint super antedicta decima perpetue firmitatis, tenebimur^f racificare sincero studio et omni opera, qua valemus.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 305, S. 246-247