Wir Otto vnd Hainreich die pru^eder von Ror tu^on chunt allen den, di disen brief ansehent, daz vnser hertzen libev mv^oter vnd frowe Alhait hat | gegeben dem goteshaus hintz Raitenhaslah durich ir sei hail vnd durich unsers vater sei zehen phvnt||
Regenspugær phenning nah ir tod mit vnserm gutem willen auf dem hof vnd auf der hu^ob datz Altsperig vnd auf allem dem, daz vnser li^ebev muter vnd wir da haben, versu^oht vnd vnversu^oht. Darv^ober haben wir, ich Otto vnd min prvder Hainr(eich) von Ror, genomen du^orich vnser du^orft von abt Chunrat vnd der sammvng datz Raitenhaslah zwai vas weins vmb aht phvnt Otingær phenning vnd vir mu^otte rokken Otinger vnd zehen metzen vnd vir mu^otte habern auch Otinger mazzes vnd ainen maidem vmb sehs phunt Otinger vmb ditz vor genantez gut, daz vnser muter durich ir sei vnd durich vnsers vater sei dem gotsha/vs datz Raitenh(aslah) hat gegeben vnd daz auch wir von dem gotshaus genomen haben, als oben genant ist, so haben wir abbt Ch(unrat) vnd dem goteshaus datz Raitenhaslah fv^or aigen gegeben daz vor genant gu^ot datz^a Altsperig, also daz wir niht auznemen noh acher noh holtz noh wis noh wazzer noh nihtes, daz wir da haben oder ie da gewunnen, an dreizich phenning geltes, die geho^erent ze selgeræt zu des heiligen gaistes alter datz Purchusen, mit der beschaidenhait vnd mit dem gedingen, ob wir Otto vnd Hainr(eich) die prv^oder von Ror vor vnser frowen tvlt ze der lihtmisse, di schirst chomt, vnd von||
danne v^ober ain jar dem goteshaus datz Raitenhaslah widergeben daz gut, daz wir von im genomen haben, so sol daz gu^ot datz Altsperig allez ledichlichen wider an vns gevallen alsam e. V^ober dise sach alle hat abt Ch(unrat) vnd die sammvng von||
Raitenh(aslah) gesatzet an vnser beschaidenhait vnser mvter frowen Alhaiden vnd an mich Otten von Ror, swaz wir si haizzen geben vmb daz gv^ot minner oder mer, di selben schiedvng svln auch wir tv^on vor vnser frowen tv^olt ze der li^ehtmisse, di schirst chomt. Stiribt aber vnser ainz in der frist, des got nihten geb, so sol iz der schaiden, der da lebent ist. Vnd ze ainem vrchv^end vnd zerstætigvn dirre sahe^b geb wir abt Ch(vnrat) vnd der sammvng disen brief versigelten mit vnserm insigel. Dirre brief ist geben an der ainliftausent magd tag des jares, do von vnsers herren pu^ort waren tausent jar vnd zwaihundert jar vnd siben vnd ahtzig jar. Vber dise rede alle so setzen vnd saphen vnd^c schaiden wir Otte von Ror vnd mein hertzen libiv mu^oter frowe Alhait mit des abbt Ch(unrat) vnd der sammung datz Raitenh(aslah), ob ich Otte vnd mein mvter pediv sterben vor liehtmisse, div schirist chomt, daz danne herr V^olrich von Seifridesdorf schidman sei an vnser stat auf sein triwe vnd auf sein gewizzen. Dirre sache sint getzivge: Meingoz von V^oberæcher, Vl(rich) Chalp, Ch(unrat) dev^d richter, Lvd(wig) der Swæntener, Al(brecht)^e der propst, Frid(rich) der Haller, Ortib vnd Fr(idrich) di Anichen, Herinrich^f, Seibot Zink, Ch(unrat) Fo^erstel, Ot der hu^oter vnd ander erberiger leut genu^onch.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 418, S. 339-340