Ich Alber der vitzvm von Pharrchirchen^a tv^on chvnt allen den, di disen brief ansehent, daz mines herren lev^te, fro^vwe | Mæhthilt vnd ir zwen sv^en Chvnr(ad) vnd Hainr(eich) etleichen chriech heten genomen vmb erbreht av^f dem hof datz Waltenperg, daz chlagt der erberig abbt Chvnr(ad) vnd di samnvnge datz Raitenhaslach mine^m herren dem edeln hertzogen H(ainreich) von Baiern als verre, daz der chriech von peiden tailen wart an mich lazzen mit gv^otem willen. Davon han ich geschaiden also, daz der erberig abbt Chvnr(ad) vnd di samnvng dvrch minen willen vnd dvrch ir beschaidenhait den vorgenanten lev^ten den hof datz Waltenperg gelihen habent ze pâwemans reht von der liehtmisse, di nv gewesen ist, v^eber zwai jar, also daz si dem goteshv^s von Raitenhaslach dinen sv^eln di zwai jar von dem hof daz drit tail vnd allen dienst vnd stêwer, di darzv geho^erent, an alle Widerrede, vnd als di vorgenanten zwai jar ein ende habent, so sol vro^vwe Mæhthilt vnd ir zwen sv^en^b Chvnr(ad) vnd Hainr(eich) nimermer chain chriech noh dehain ansprach gewinnen noh chain fv^erzoch haben noh gewinnen av^f dem hof datz Waltenperg, svnder der erberig abbt sol in bestiften mit swem er wil als von reht sines goteshv^s lediges aigen. Daz dise sache also stæt sei, geben wir dem abbt von Raitenhaslach vnd der samnvnge disen brief versigelten mit vnserm insigel. Der brief ist gegeben an dem svntag ze mitter vasten des jares, do von vnsers gewrt waren tavsent jar zwai hvndert jar vnd æht vnd ahtzich jar. Des sint geziv^ch: brvder Berch(told) der chelnær, brvder Pozan, her Ch(vnrad) der pharrær von Perchirchen^c, her O^ertwein vnser Schreiber; her Hainr(eich) von Eisenpv^och, Wilham der Sahse von Gern, Wernhart der rihter datz O^eting, Frid(reich) der castnær da selben, Chvnr(ad) Plonschilt, Albreht der Tetelhaimer, Pilgreim der Galær, Otte vnd Wernhart von Havsen, Gerolt von O^eting^d, F(ridreich) der Chrispelsteter, maister Wernher, Dietmar der Helglær^e, Jordan ir probst, Chv^on vnd Vlreich, des abbtes chnete von Raitenhaslach, vnd ander erberiger lev^t vil.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 421, S. 343-344