Wir Fridreich, Vlreih, Hainr(eich) vnd Chunr(at) von Hallerprvk^a vergehen vnd tu^oen chunt allen den, die disen prief lesent | oder ho^erent lesen, daz wir den hof datz Prinhausen vnd die gu^ot datz Chruzenpu^ehel^b vnd ze Voro^ed vnd zwai datz Laidreting vnd siben zehenthaus vmb Schrenchenbach haben verchauft dem ersam apt Chunr(at) von Raitenhaslach vnd siner sammung vmb sehs vnd sibentz pfunt pfenning Salzburger mu^ensse^c mit guten willen aller vnser chint, wan besunderlichen ygleichs sinen leitchauf hat enpfangen vmb die Verzeihung, vnd ze dem ersten dev meinen Fridreihs chint, Chunrat, Vlr(eih), Friedreih, Ludweich^d, vnd auh mein Vlreihs chint, Chu^onrat, Vlreih, Gebhart, Wernher, Diemu^ot vnd Chu^engund, vnd auh div meinen Chu^enratz, Vlreih vnd Chu^engunt, vnd haben dev vorgenanten gu^ot mit allem dem, daz da zu^oe geho^ert, besu^oechtz vnd vnbesu^oechtz, swie ez genant ist, fu^er vreiz vnd ledigs aigen geben dem gotzhaus ze Raitenhaslach, also daz wir noh vnserev chint nimmer mer dhainen chriech noh dhain ansprach darnah su^eln noh mu^egen haben noh gewinnen. Vnd daze der chauf vnzebrochen vnd stæt behalten wert dem oft genantem gotzhaus ze Raitenhaslach, haben wir Fridreich vnd Vlreich vnserev aigenev insigel gelegt an dise hantvest ze einem^e waren vrchu^end. Vnd wan wir Hainreih vnd Chu^onrat niht enheten aignev insigel, hat her Chu^onrat von Teching vnd her Niclay von Ambrang durih vnser vlig vnd pæt irev insigel gehangen an disen brief ze einer ewigen bestætigung aller der sache, die oben gescriben sint. Distz chaufez sint gezeug: her Chu^onrat von Teching, her Nicolay von Amprang, Chu^on von Auperch^f, Fridreih der Chrispelsteter, Fridreih der Darm, Hainr(eich) von Pimzwanch, Ditmar der Heglær, Vlreih von Auw, Hainreih der Puhs, O^ertel dez aptz kneht, Ortlieb dez chelners chneht, vnd^g H.^h der Gwikker ist auh gezeug vnd her Frid(reich) der pfarrer von Grabenstat vnd Vlreich Puch den gast vnd ander erberigen zeug genu^oech. Wir veriehen auh all vier bru^eder von Hallerprvk, daz wir die oben gescriben gu^ot haben auf gesælt ze Raitenhaslach) auf vnser fraun alter ze gesihtt vnd zee dere gegenwrtichait aller der sammung vnd dez gesintz ze Raitenh(aslach), die all samt diser sache gezevg sint. Disev hantvest ist gegeben datz Raitenhaslach, do von vnsers herren geburt waren tausent jar zwai hundert jar vnd in dem nevn vnd ohzig jar dar nah, dez suntags nah sant Philips vnd sand Jacobs tach.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 430, S. 350-351