Ich Hainreich von Ror tv^on chunt allen den, di disen brief ansehent, daz mein bru^oder Otte, dem got genad, vnd ich I haben gegeben * dem gotzhaus hintz Raitenhaslah durich vnser sei willen vnd vmb sehtzich pfvnt Otingær pfenning vnser gv^ot datz Altsperch, also daz wir niht auzgenonamen haben noh vns behalten, swaz vnser vater vnd vnser mv^eter da gehabt habent vnd auch wir selbe, noch akker, noch holtz, noch wismat, noch wazzer, noch Waid, noch iht, daz wir da haben oder ie da gewunnen, gesv^oht oder vnversv^oht, an drizzich pfenning Regenspurgær *, di geho^ernt zv des hæiligen geistes alter datz Burchausen. Nv ward vns der pfenning, daz ist der sehtzich pfvnt, ettlich tail gegeben, di weil mein brv^oder Otte lebt, daz ist zwainzich pfvnt vnd sibenev, vnd nach meines brvder tod hat vns abbt Chvnrat vnd daz gotshaus datz Raitenhaslah gewert gar vnd gæntzlichen der sehtzich pfvnt. Nv han ich minen hof datz Emichaim geantwurt daem gotshaus datz Raitenh(aslah) ze ainem fv^erpfant fv^er di drizzich pfvnt, div meinen bru^oder vnd sinev chint angevallen sint, vntz daz si vergehen, daz si der drizzich pfvnt Otingær gewert sein, vnd lob getrævlich, daz ich des vorgenanten gv^otes datz Altsperch gewer sei des gotshaus datz Raitenh(aslah), als ze Bairen in dem lande reht ist. Des sint getzivch: Syghart der pfarrær, Virich der Chalp, Friderich der Hallær, Otte der Hvtær, Friderich der Anich, Ermreich, Seibot de Zink^a, Hainr(eich) der Choplær^b, Hainreich der Stamhaimær^c, Ghvnrat der Loter, Albreht des Rorærs probst, Fridereich der Lv^of, auch sein chneht, Vlreich vnd^b Chvn des abbtes chnehte vnd ander vil erwæriger lavt. Dirre brief ist gegeben, da von vnsers herren tod woren tausent jar zwai hvndert jar vnd nevntzich jar, an vnser frowen tach als si geboren ward. Daz afer disev red vnd ditze geding stæt beleih, geben wir dem gotshaus von Raitenh(aslah) disen brief verinsigelt mit vnserm insigel.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 437, S. 358-359