Ich Alhait von Ror tvn chvnt allen den, di disen brief ansehent, daz abbt Chvnrat vnd daz gotshaus vnd div | ersam samnvng von Raitenhashach habent gechauft von minen svnen Otten vnd Hainreichen ir gv^ot datz Altzperch, swi daz genant ist, akker, holtz, wismat, waid, wazzer, versv^eht vnd vnversv^eht, allez daz si da heten oder ir vater oder si ie da gewunnen, an drizzich pfenning Regenspurgær, di sulen si alle jar geben von ainen lehen, daz in dem selben gv^ot ist, auf des heiligen geistes alter datz Purchausen^a. Nu ist daz selbe gv^ot datz Altsperch, als iz vorgenant ist, vnd allez^b, daz zv^o geho^ert oder ie dar zv^o gehort, mein morigengab gewesen von minem sæligen wirt herrn Hainreich von Ror, also daz ich iz solt haben piz an meinen tot. Nu han ich daz selbe gv^ot gar vnd gæntzlichen dem gotshaus vnd der samnvng von Raitenhaslach gegeben, also daz ich mir nihtes niht da behalten han, swaz mein wirt oder miniv chint oder ir vodern oder ich ie da gewunnen, vnd han mich sein gar vnd gæntzelichen verzigen; vnd sulen si mir geben sehs pfvnt O^etingær pfenning, di in dem gericht gib vnd gæb sint, alle jar an sand Martins tag piz an minen tod; afer nach meinen tod, want^c daz gv^ot nicht langer mein ist, nivr di weil ich leb, so ist daz gotshavs ledich vor aller ansprach, vnd sol daz vorgenant gv^ot des gotshaus von Raitenh(aslach) ledichlichen vnd ewichlichen beleiben. Gebent si mir afer div vorgenanten sehs pfvnt niht an sand Martins tach, als vor gesprochen ist, so sol ich si manen vmb di pfenning, daz man mir di geb in aht tagen; tv^ent si des niht, so sol der prior vnd der^d vnderprior vnd der chelnær vnd der vnderchelnær vnd der bursær^e niht messe sprechen noch wein trinchen noch vische ezzen, piz daz di pfenning gæntzlichen gegeben werden. Ich sol auch der selben morigengab ir gewer sein vntz an minen tod, ob si iman ansprichet vmb daz vorgenant gv^ot. Daz disiv red stæt beleih, gib ich in disen brief verinsigelt mit minem insigel mit den^f getzivgen, di pi der sach waren vnd auch^b hie geschrieben Stent. Daz ist her Wernhart der oberguster von Raitenh(aslach) vnd der subprior brvder Hainr(eich) daselben, brvder Bozan der oberchelnær, brvder Hainr(eicb) der chastnær, brvder Purch(art) von Regenspvrch, her Sighart der pfarrær vnd her Hainr(eich) der pfaerrær von M^oering; Ermreich, Wernhart Anich, Friderich Anich, Zeibot Zinkke, Hainr(eich) Zinkke, Perichtolt der Sahse, Hainr(eich) der richtær, Otto Hv^otær, Hainr(eich) der Hirz, Wernher der Schrimpf, Vlr(eich) des abbtes chneht vnd anderrer eribærigær lavt genv^onch. Diser brief ist gegeben, da von vnsers herren gebvrt waren tausent jar zwain hvndert jar vnd nevntzich jar, an sand Cecilien tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 440, S. 362-364