Wir Hainreich von gotes genaden der abbt von Sew^en tu^en chunt allen den, die disen brief ansehent, das in vnser chloster cho^emen der erwirig abbt von Raitenhaslach von einem tail vnd Pernhart vnd sein bruder Ghunrad von Pfa^effing von dem andern tail vnd chriegten mit einander vmb das gut datz Walthalming; den selben chrieg liessen paidew tail an vns vnd an Herrn Hainr(eich) von Rosenhaim vnd an Hainr(eich) von Chiemperch vnd an Fridreichen von Chrispelsteten. Nu haben wir geschaiden, also das Pernhart vnd sein bruder Chunrad von Pfa^effing das vorgenant gut datz Walthalming dem gotzhaws datz Raitenhaslach habent aufgeben ga^entzleich vnd freileich fu^er aigen vnd habent es widerstanden von dem gotzhaws, also das si vnd ir erben dem gotzhaws sulle alle jar ewichleichen geben sechtzigt pfennig der munsse, die in der grafschaft gib vnd gab sind, an sand Michelstag; tu^ent si des nicht, so sullen si frist haben vntz an Merteins tag; gebent sie denne des nicht, weder tail von den zwain pruderen oder sein erben ir zins nicht gebent an dem vorgenanten tag, die sullen verlorn haben alle die gnad vnd ir recht, das in darauf verliehen ist; vnd das das vorgenant gut datz Walthalming sol denne ga^entzleichen vnd freileichen wider uallen an das gotzhaws datz Raitenhaslach. Das dise rede also sta^et sei, geben wir in disen brief nach paider tail pet versigelt mit unserm insigel. Des sind zeugen: her Perichtold vnser prior, her Fridreich der guster, her Chunrad der verweser von Obing, Hartweich unser Schreiber; Fridreich von Chiemperch vnd sein su^en Fridreich, Hainr(eich) Preisfues, Ott vnser chnecht vnd ander erber la^ewt. Diser brief ist geben datz Sewn an sand Dionisii tag, do von vnsers herren gepurt waren tawsent jar zwain hundert jar vnd newntzigt jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 438, S. 359-360