Ich Ortlib von Wald vergihe vnt tv^on chvnt allen den, di disen brief ansehent oder ho^erent lesen, I daz Ortlieb von Steten vnser aigner man, dem got genad, dem goteshvs datz Raitenhaslach het gelihen zwelf march silbers, also daz daz selb goteshv^s daz vorgenant silber, als O^ertel niht enwære, solt geben sinem svn Otten. Nv hat got verhangt, daz der vorgenant Ortlieb von Steten chvrtzlichen wart zezvchet von disem eilende, vnd davon so han ich Ortlieb von Walde vnd Ott von V^eberækch des chindes^a vnd Stephan sin veter di zwelf march silbers von dem goteshvs ingenomen gar vnd gantzlich dem chinde ze behalten, vntz daz iz zv sinen jaren chom, daz man iz anderswo ninder anlegen sol, wan dem chinde ze fvdervng. Vnd des pin ich Ortlieb von Walde des chindes schaphær vnd behalter vnd sin ene Ot von Vberæche vnd^b des chindes veter Stephan. Wir jehen avch an disem brief, daz das goteshvs von Raitenhaslach dem chinde noh chainem sinen vrevnden nihtes niht mer schvldich ist chlain noh groz. Des sint gezevch: der Pv^ochpeche, Ot von Vberækch, Stepan der Stetnær, Vlr(ich) der Awer, Vlr(ich) vnd Hadmar von Talhaim, Friderich von Tv^enigen vnd ander erwerig levt. Darv^eber han avch ich gegeben dem goteshvs von Raitenh(aslach) disen brief versigelt mit minem insigel, des jares do von Christes gebvrt waren tavsent jar zwai hvndert jar vnd in dem vier vnd newnczigistem jar. Vnd der vorgenanten sache aller pin ich Ortlieb von Wald vnt Ot von Vberæch vnd Stephan von Steten porgen.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 458, S. 376-377