Wir Ott, Lodwich vnd Stephan von gotes gnaden pfallentzgraven ze Ryn, hertzogen ze Baieren, tvn allen den chvnt, die disen brief ansehent od[er] | ho^erent lesent, daz wir gesehen haben vnd gelesen vnsers hertzenliben vater brief, dem got genad, hertzog Heinrichs von Baieren. An dem selben brief hat er erchant vnd bestætiget dem goteshavs von Ratenhaslach alle di gnade vnd di vreitvm vnd div rehte, div der stv^ol von Rome vnd di cheiser vnd di chvnige vnd vnser vorvaderen dem orden von Cytel vnd dem goteshavs von Ratenhaslach habent gegeben, vnd hat verboten an dem selben brief allen sinen amptlevten vnd sinen rihtæren vnd schergen, daz si daz vorgenant gotshavs vnd alle ir levt vnd ir gv^ot niht sv^eln noch getvrren beswæren noch leidigen mit herbergen vnd mit fv^etern noch mit deheinem twanchsal, noch auch di rihter niht sv^eln twingen ir levt v^of dehein taidinch vmbe dehein sache noch vmbe dehein reht, wan si selbe daz vrlavb habent vnd den gewalt, daz si alle die sache ho^eren, di ir levt angeent, vnd so si siv geho^erent, daz si di selbem sach mit volligem gwalt mvgen vnd svln rihten, an als vil ob dehein des gotshavses man wurd begriffen mit sogetanen sachen, daz man mit dem tod v^eber sin leben solt rihten, wan geistlich orden sogetan geriht niht tvrren getv^on, so sol der rihter den selben man nemen alein, als er mit der gv^ertel ist begriffen, vnd sol allez daz gv^ot, daz der man hat, varent vnd vnvarent, dem goteshavs beliben. Wand wir vnseres hertzenlibes vater brief gesehen haben vnd di andaht, di er gein got vnd gein vnser frowen vnd gein dem gotshavs ze Ratenhaslach hat gehabt, di wellen wir niht minneren, svnder wir wellen si mit gantzem willen vnd besvndern gnaden meren vnd volfu^eren. Da von gebi^eten wir allen vnseren amptlevten, vnseren rihtæren vnd vnseren schergen, daz si des goteshavses lævten von Ratenhaslach niht getvrren noch svln beswæren noch laidigen mit herbergen noch mit fv^eteren vnd mit deheiner twanchsal. Swelher rihter oder scherig daz v^eberget, so sol der rihter vns geben ze bv^ozze zehen pfvnt, der scherge fvmfiv, vnd sol dem gotshavs sinen schaden abtv^on. Wir gebiten auch allen vnseren rihtæren vnd schergen in allem vnserem lande, daz si deheinen des^a gotshavses man niht betwingen noch gebi^eten ze cho^emen v^of dehein ehaft taidinch noch v^of dehein besvnder taidinch, wan von altem reht vnd von vnseren besvnderen gnaden, vnd gab si^a den gewalt habent vnd svln haben, daz si alle di sache svln ho^eren, die ir levt angeent, vnd so si die ho^erent, so svln si mit volligem gewalt rihten. Swelich rihter oder scherig der sache deheiniv v^ebervert oder zebrichet, als dike er daz tv^ot, so sol vns der rihter zehen pfvnt geben vnd der scherig fvmfiv vnd dem gotshavs sinen schaden abtv^on. Geschaech aber daz, daz des gotshavses man sogetan missetat tæt, dar vmb man rihten sold v^eber sin leben mit dem tod, so sol der rihter den selben man nemen, als er mit gvrtel bepfangen ist, vnd allez daz gv^ot, daz er hat, varent vnd vnvarent, daz sol^b dem gotshavs beliben von Ratenhaslach. Nem aber der rihtær gv^ot fv^er sinen tod, des sol der rihter des gotshavses geschol sin, sam er ez genomen het v^oz einem brv^oder hof. Vber di sach alle verbi^eten wir allen den vorsprechen vnd taidingæren, di in vnserem lande sint, bi dem aide vnd fvmf pfvnden, daz si immer iht getaidingen oder ertailn wider allen den vreitvm vnd wider div reht, div wir dem gotshavs ze Ratenhaslach erchant haben vnd im gevestet haben mit vnseren bri^even. Auch binden wir vns dar zv^o vnd geloben bi vnseren gnaden, daz wir alle vnser rihter vnd schergen da zv^o betwingen mit den wandeln, div vorgenant sint, daz si behalten dem gotshavs von Ratenhaslach alliv div reht vnd den vreitvm vnd di gnad, di wir im vnd vnserem getrewen abbt Chvnraden vnd siner sammvng haben gegeben. Ist aber, daz man des gotshavses man einen ansprichet vmb eigen vnd vmbe lehen vnd daz daz selbe aigen vnd lehen des mannes ist, den man dar vmb ansprichet, vnd niht des gotshavses, der sol daz reht von vnseren rihtæren tv^on vnd niht vor dem abbt an di levt, di des gotshavses inwertz aigen habent, daz sol der abbt, der danne ist, selbe rihten, wan di selben lævt bedenthalben des gotshavses sint. Ez ensol auch dehein vnser rihter niht rihten von des vorgenanten goteshavses aigen. Vnd daz im daz allez also stæt vnd vnzebrochen belib, dar v^eber haben wir dem vorgenanten gotshavs ze einem waren vrchvnde gebn disiv hantvest versigelt mit vnseren insigeln. Disev hantveste ist gegebn datz Stravbing^c, da von Christes gebvrte waren tavsent zwai hvndert jar in dem fvmf vnd nevntzigistem jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 467, S. 385-387