Wir swester Bendicta abbta^essin von Lantzhwet vnd aller conuentt tu^en cunt allen den, die disen brief sehent oder lesent, das vnser lieber vrivnt her Ludweig der Grans durich got vnd durich seiner sei willen vnd seiner hausfrawen vnd seiner voruodern sei vns ein phunt geltes Regenspurger pfennig vmb fu^enfzehen phunt der selben mu^ensse^a ze Cholbach ein gu^et gechauft hat. Die selben trew vnd die liebe, die er vns getan hat, haben wir angesa^echen vnd haben iem vnd seiner hausfrawn durich got bruderschaft bey in lembtigen gegeben vnd machen sy tailha^eftig aller der gu^et an petten, an vasten vnd an allen den gueten dingen, die got von siner gu^et an vns geruchet ze wurichen. Wi^er veriechen auch an disem brief, das wir alle jar nach seinem tode sein jarczeit vnd seiner hausfrawnn Chunigunden vnd seines vatter eines Rudolfes vnd seiner mueter einer Getrud an sand Jo^ergen tag began wellen, also das an dem selben tag das vorgenant phunt vnserm conuent vmb wein vnd vmb vischs vnd vmb prowt gegeben werde. Vnd das das ewichleich geseche vnd staete beleih vnd an welichem jar saumung dar an gescha^eche, des nicht sein sol, das man die jarczeit nicht begienge vnd dem conuent das phunt als sein vorgedacht ist, nicht gegeben wurde, so sol der werde abbte vnd der ersam conuent ze Raitenhaslach ein phunt, geltz das selbe jar auf vnserm gut ze Bu^ech, das bey Otting ligt, haben vnd sol dew ee gesprochen jarczeit von in wegangen werden. Vnd der sache sind gezeuge: her Chunrad der abbte ze Raittenhaslach vnd her Fridreich der prior daselben vnd her Fridreich der chelner vnd her Wernhart der guster vnd swester Berchta dew priorinn vnd swester Ita dew chlenerin^b vnd swester Cecilia dew gu^esterin vnd swester Agnes dew subpriorinn vnd vnser bru^eder: bruder Wernhart von Pawngarten, bruder Sibot, bruder Altman, her Seyfrid vnser chappellan. Dar u^eber wellen auch wir, das der nachste nu^etz von dem gut, den man an dem nächsten heribst in nympt, von vns vnd von vnser scha^efferin dem conuent vnd dem vorgenanten sand Go^ergen tag geben sol, als es vorgeschriben ist, vnd solen sein vnd seiner hausfrawnn als wol lembtiges gedenkchen ewichleich als todes. Vnd dar uber geben wir im vnsern brief versigelt mit vnserm insigel. Vnd der brief ist gegeben nach vnsers [herrn]^c geburt tausent jar zwain hundert jar an dem fumftzigistem jar, an sand Valtans tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 470, S. 388-389