Wir bru^oder Friderich der abbt ze Raitenhaslach tu^on chund allen den, die disen brief ansehent oder ho^erent lesen, | daz her Hainreich von Hoholting durch got vnd durch siner sel hail sein reht aigen, da chain sein pru^oder noh ander niemen chain reht an habent, daz sint zwo hv^ob datz Cholbach, vns vnd vnserm gotzhav^s her ze Raitenhaslach hat gegeben ze rehtem sælgræt mit allem dem, daz darzv^o geho^ert, holtz, veld, wismat, wazzer, gesu^oht vnd vnversu^oht, mit sotanem gedinge, daz nach sinem tode hern Hainreichs von Hoholting aller der dienst, der geho^ert von den zwain hv^oben datz Cholbach, sol gegeben werden ewichleichen an den zwain tagen vor dem aschstag, daz ist an dem mæntag vnd an dem eritag, vnd an dem palmtag vnd an den næhsten drein tagen dar nach, daz ist an dem mæntag vnd an dem eritag vnd an dem mitichen, vmb vische. Vnd swaz v^eber wirt, daz sol man an andern vastagen geben. Wir svln auch von dem vorgenanten gv^ot alle jar dreizich phennig Regenspvrgær hintz Salmansweilær^a geben. Geschæch aber daz, daz ditz geschæfft vnd disev gv^otat vnser sammung hie ze Raitenhaslach, als oben geschriben ist, niht wrd behalten gar vnd gæntzlichen, so sol daz selbe jar, swenne man iz versavmt, der vorgenant di^enst von Cholbach gar vnd gæntzlichen gegeben werden hintz Salmanswi^elær. Vnd ze einem waren vrchv^end hat der oftegenant^b her Hæinrich von Hoholting vns in nutz vnd in gewer pei im lemtigen gesetzet vnd hat vns di zwai gu^ot von Cholbach auf gegeben auf der schrann datz Purmansgwikk^c offenlichen. Vnd dar vmbe daz man wizze vnd erchenne, daz wir pei im lemtigen sein gesetzet in nutz vnd in gwer, geit er vns, di weil er lebt, sehcich phenning Regenspurgær vmb vische an dem palmtag vnd hintz Salmansweilær^a dreizich phenning Regenspurgær. Diser rede vnd diser sach sint gezevch: der techent von Zidlarn^d, der Weilbergær, Aebbelin von Zimbærn, vone Altenburch, Wernhart Vislær, Chvnrat Geruber, Chvnrat des Sahsen aidem, Goltzstain von Purmansgwikk^c, Chvnrat vnd Virich von Butting^f, Ru^eger auf der Tvrten, Ru^opreht vnser probst, Hainrich von Tremelshoven^g, Perhtold von O^ede vnd ander erberig leuit. Vnd daz disev sache stæt beleihe, geben wir im disen brief versigelt mit des edeln herren Hæinrich graven von Lewenberch^h insigel vnd mit vnsers herren insigel des abbtes von Salmansweilær vnd mit vnserm insigel. Diser brief ist gegeben, do von Christ geburt waren tausent jar drev hvndert jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 491, S. 408-409