Ich Hainrich von Hoholting tun chunt allen den, die disen brief ansehent oder horent lesen, daz ich durch got vnt durch [meiner sei hail mein reht aigen, do dehain mein bru^oder noch ander niemen dehain reht an habent, daz sint zwo hu^ob datz Cholbach, der samnung vnt dem gotzhaus datz Raitenhaslach han gegeben ze rehtem selgræt mit allem dem, daz dar zv^o geho^ert, holtz, velde, wismat, wazzer, gesu^oht vnt vnuersu^oht, mit sotanem gedinge, daz nach minem toet aller der dinst, der do gehort von den zwain hu^oben datz Cholbach, sol gegeben werden ewichleichein an den zwain tagen vor dem aschtag, daz ist an dem mæntag vnt an dem erigtag, vnt an dem palmtag vnt an den næhsten drein tagen dar nah, daz ist an dem mæntag vnt an dem eritag vnt an der mitichen, vmb viesche. Vnt swaz vber wiert, daz sol man an ander vastagen geben. Si suln auch von dem vorgenanten gu^ot alle jar dreizich phenning Regensburger hintz Salmansweilær^a geben. Geschæch aber daz, daz ditz geschæft vnt disev gu^otæt der sammung von Raitenhaslach, als oben geschriben ist, niht wrde behalten gar vnt gæntzlichen, so sol daz selbe jar, swenn man iz versaumt, der vorgenant dienst von Cholbach gar vnt gæntzlichen gegeben werden hintz Salmansweilær^a. Vnt ze einem waren vrchu^ende han ich Hainrich von Hoholting sev in nutze vnt in gwer bi mir lebentigen gesetzet vnt han in di zwai gu^ot von Cholbach aufgegeben auf der schrann datz Purmansgwikk^b offenleichen. Vnt dar vmb daz man wizze vnt erchenne, daz si bei mir lebentigen sein gesetzt in nu^otz vnt in gwer, gib^c ich in, di weil ich lebe, sehtzich phenning Regensburger vmb viesch an dem palmtag der sammung vnt hintz Salmansweilær^a dreizch phenning Regensbu^orger. Diser rede vnt diser sahhe sint gezevch: der tehhent von Zeidlorn^d, der Weilbergær, Albelin^e von Zimbern, von^f Altenburch, Wernhart Vislær, Chunrat Gru^ober, Chunrat dez Sahsen aidem, Goltzstain von Purmansgwikke, Chunrat vnt Virich von Butting^g, Ru^odger aus der Turten, Rupreht ir probst vnt ander erwærig lævt. Vnt daz disew sahhe stæt beleihe, gib ich in disen brief versigelt mit meines herren dez erwærigen hern vnt abtes Vlreichs von Salmansweilær insigel vnt meines heren Hainreichs dez graven von Leonberch^h insigel vnt meiner frawen Agnesen siner mu^oter insigel, wan ich selben niht insigels han. Diser brief ist geben, do von Christ geburt waren tausent jar vnt drew hundert jar.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 490, S. 407-408