Wir Leutold von Chunring verjehen offenbar vnd tu^en chundt allen den, dy disen brief lesendt oder ho^erendt, daz wir durch got vnd vnser vodren sei willen haben geben vnser freis aigen dacz Wa^edling vnser frawn vnd dem goczhaus ze Raytenh(aslach)||
ze einem rechten selgera^edt vnd haben iz aufgesa^elt aller dingen vreileichen vnd ledichleichen. Vnd daz der rat also sey, haben wir disen brief geben dem goczhaus ze Raytenh(aslach) versigelten mit vnsern hangenden insigel ze einem waren vrchund dez selben selgra^ecz. Dez sind geczeug: her Alber von Chu^enring, her Hadmar von Chunring, her Chunradt von Potendorf, her Ornold von Tobran, her Ornolt von Praunstal, Ornold Heunel; her Hilprant, her Ainweich bru^eder vnd mu^enich ze Raytenh(aslach) vnd ander zeug genu^eg. Der brief ist geben dacz Tirnstain mit gu^etem willen vnd gewizzen fraun Agnesen vnser hausfrawn vnd vnser sun Jannsen vnd Hadmars dez jars, do von Christus gepurd waren dreuczehen hundert jar vnd in dem dritten jar dar nach, an sand Matheis tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 503, S. 419-420