Ich Engelbreht von Tæching vnd Periht mein hausfrauw^e verjehen offenbar vnd tu^oen cbunt allen den, die disen prief lesent I oder ho^erent, daz wir vnd alle vnserev chint H(ainreich), Ch(u^onrat), Hertneit, Popp, Ott, Frid(reich), Eit, Levkart, Elzbet, Katerei, Christein, Ludmey vnd Agnes vns haben verzigen vnd sein gestanden gar vnd gæntzliech von allen den rehten vnd von allen den ansprahen, die wir hæten an der od datz Wizentzhart^a, die mein vater Ott von To^erring hæt gesætzet Ru^oprehten vnd Leutolden von Imzing vmb sezehen pfunt pfenning, vnd wan die vorgenanten Imzinger dev selben sæhzehen pfunt hæten gegeben hintz Raitenhaslach ze rehten sælgret, do hat der ersam apt Vlr(eich) von Raitenhaslach mir vnd meinen chinden geben sehzich vnd vier pfunt, daz wir vns verzigen haben, vnd wan etzlei[chs vnser chind ni]ht^b in dem lant waren, so hab wir vnsers vreien aigens vnsern hof datz Nustorf^c gesætzet ze einen fu^erpfant, so si erst ze lant cho^emen, daz si sich ze Raitenhaslach su^eln verzeichen; gesæhe dez niht, swaz ansprache oder chriech do von daz gotshaus wrt angeent, daz sol daz gotzhaus Raitenhaslach haben auf dem hof datz Nustorf^c. Vnd daz dev vorgenant o^ed datz Wizentzhart^a ewichleich bestee vnser frauwen vnd dem gotshaus datz Raitenhaslach mit allem dem da zu^o geho^ert, besuechst vnd vnversuechst, als oben gescriben^d ist, so haben ze einer pesserr bestætigung erworfen mit vlig vnd grozzer pæt, wan wir niht aigens insigels hæten, daz^e her Ludweich der Grans, her Chu^onrat von Tæusenperch vnd Ch(u^onrat) der Voglær, rihter ze Traunstain, ir insigel habent geleit ze einem waren vrchu^ent aller diser sache. Dez sint gezeug: Frid(reich) von Hallerpruk^f, H(ainreich) pei Chrevtel, Vl(reich) der Swær, Vl(reich) Vngælt, H(ainreich) der Tren, Seifrid von Chraymos^g, Vl(reich) von Holtzleiten, Frid(reich) von den Swaben, H(ainreich) von Nustorf^c, Ortlieb des chelners^h kneht, Seibot Zingk. Der prief ist gegeben datz Raitenhaslach, do von Christz geburt waren drevzehen hundert jar vnd in dem vierden jar da nah, dez mitichens ze mitterr vasten.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 515, S. 430-431