Ich Jans vnd Nycla mein bru^oder von Pfeffing^a vergehen offenbar vnd tu^oen chunt allen den, die disen prief lesent oder ho^erent lesen, daz | vnser vater Chu^onrat von Pfeffing^a, dem got gnad, hat geben ze chaufen seinen hof datz Gunzenperch^b mit allem dem, daz da zu^o geho^ert, versu^oechtz vnd vnuersu^oechts,swi iz gnand^c ist, dem erwærigen apt Chu^onraten vnd seinem gotzhaus datz Raitenhaslach vmb fu^emf vnd fu^emfzich pfunt pfenning vnd hat im bestætigt den selben hof datz Guntzenperch^b fu^er vreiz vnd ledigs aigen mit manigem piderm man, die ir triwe vnd allez ir gu^ot satzten ze einem fu^erpfant vnser frauwen vnd dem gotzhaus datz Raitenhaslach, swelich anspräche oder schaden daz gotzhaus ze Raitenh(aslach) enpfieng von dem chauf, daz si den schaden scholten dem gotzhaus abtu^oen vnd ablegen, als teuwer vnd der hof wær. Daz waz geschehen, do von christz geburt waren zwelif hundert jar vnd siben vnd sibentz jar an sant Johans tach ewangelistz. Daz gestu^oend als lang, daz daz gotzhaus ze Raitenh(aslach) ohzehen jar nutz vnd still gewer het dez hofs datz Guntzenberch^b. Vnd wan wir ze der selben zeit chint vnd so junch waren, daz wir dez selben chaufez niht gedahten, sprachen wir daz^d gotzhaus datz Raitenhaslach^d vmb den oft genanten hof an mit dem reht. Dez wart dev selb ansprach enschid lazzen an hern Wernharten den ersam tæchen von Gehay vnd an hern Fridreich von To^erring, an hern Chalhoh den Zuchswert vnd an sein bru^oder Charln Zuchswert; die schieden iz also, daz wir gestu^eenden von allem dem chriech vnd von allen den ansprachen, die wir hæten vmb den oft genanten hof datz Guntzenperch^b, vnd wart vns da vmb ze leichauf geben vier pfunt pfenning. Vnd daz wir zwen, Jans vnd Nycla gelopten gewer sein vor allem reht vmb alle ansprach vnd chrieg fu^er vnser pru^eder Andreen vnd Christan, vnd daz dem chauf vnd dev verrihtigunn also sei geschehen vnd daz daz gotzhaus ze Raitenhaslach ewichleich sei sicher vnd ledich vor allen ansprachen vnser vierer, mein Jansen, Nyclans, Andreez vnd Christans, da v^eber, wan wir niht aigener insigel hæten, so hab wir gepeten den ersam techent von Gehay vnd vnsern herren hern Fridreih von To^erring, daz si disen prief habent versigelt mit ir hangunden insigeln ze einem waren vrchu^end der sache aller, als oben geschriben ist. Dez sint gezeuch: her Chalhoh, Charln vnd Wernhart Zuchswerten, Ru^opreht von Imzing, Frid(reih) Lamp, Ch(unrat) Lamp, Vl(reih) Lampotingner, H(ainreich) Smerbeche, Wolfhart Swindacher, Ch(unrat) Vreioltzmoser^e, Vl(reih) von Pfeffing, Ot vnd Ch(unrat) die Talhaimer vnd ander erwerig zeug genu^oech. Der prief ist geben datz Ditmænning^f, do von v^ensers herren geburt warem dreuzen hundert jar vnd in dem vierdem jar da nach, an sand Gregorin tach. Her Ch(unrat) der pfarrer von Fridolfing vnd her Vlr(eih) der pfarrer von Dietmæning^f sint diser taidinch aller zeuch, wan si derpei waren, do daz wart getaidingt vnd verscriben.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 517, S. 432-434