Ich Walther von Taufchirchen^a mit samt meiner hausfravwen vroên Herwrgen verjehen vnt tu^on chunt allen | den, di disem brief lesent oder horent lesen, daz wir ein chrieg haben gehabt gegem dem erwærigen abbt Vlreichein vnt seinem gotshaus datz Raitenhaslach vmb zwen^b halb ho^ef, genant datz dem haus in Osterreich bei Ips, vnt vmb ander vier gu^ot da pei nahen ligent datze Chrotental. Dez haben wir vns ervarn vnt sein dez geweist, daz weder ich noh mein vorgenanten hausfravwe froê Herwrch, hern Chunn tohter dez Gutraters, noch dehainer vnser erb dehain reht an den vorgenanten gu^oten niht haben gehabt. Vnt do von haben wir vns verzigen gæntzleichein vmb daz selben gu^ot allez chri^egs vnt aller ansprah. Wir gehen auh, daz vns di vorgenanten herren abbt Vlr(eich) vnt sein samung habent geben zwai halb vas weins zv einer lieb vnt zv einer minne, daz wir daz selben gu^ot vnt ander ir vrwar dez vleizichleicher schuln vnt wellen schermen. Do von daz in furbaz von vns noch von vnsern erben dehain chrieg, ansprach oder schaden mu^eg wider varn, geben wir in disen brief verinsigelten mit vnserm insigel. Diser sahhe sint zevg: grafe Albreht von Hals, her Seifrid von Frawvenperch, her Chunrat vnt her Hainreich von Preising, her Ortlieb von Walde, her Chunr(at) der Tæhigner, her Hainr(eich) vnt her Eberh(art) di Harschirchær, her Reicher der vicedum von der Ro^et; her Ilsunch der prior von Raitenh(aslach), her Chunr(at) der chelnær, her Fridr(eich) der chamærær, her Ainweich, her Gebh(art) der Chalp vnt ander erwærig lævt mær. Der prief ist geben, do von Christes bu^ert waren tausent drew hvndert jar dar nah in dem vierden jar, an sancti Alexii tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 524, S. 440