Wir bru^oder Vlreich abbt von Raitenhaslach verjehen vnd tu^on chunt mit aller vnser samnung alle den, di disen brief | lesent oder horent lesen, das vns der ersam vnd edel riter her Ludweich der Grans gechauft vnd gegeben hat ledichleichein: des ersten den hof ze Reichpoching^a vmb sehs vnd zwainzich phunt Salzpurger phenning zv einem ewigem selgeret von seinem vater, des jartag wir begen schuln an sant Georii tag, dez nahts an der porten in der^b chapell mit einer vigili, dez morgens mit einer messe, vnd schol vns am dem selben tag von dem hof gedient vnd gegeben werden ein phunt phenning vmb viesch aller samnung. Dar nah hat der vorgenant edel riter her Ludw(eich) der Grans auh vns vnd vnserm gotshaus gechauft mit des erwærigen herren vnd piescholfs Chunrats von Salzpurch vrlaub vnd auh mit dem rat hern Ortliebs von Walde von Vlreicheim dem Tanner vnd purger ze Muldorf vmb sehs vnd ahtzich phunt Regenspurger drei ho^ef ze Polling, di genant sint Schermaiershof, Prukkshof, Wolfershof, vnd vns di selben gegeben ledichleichein zv einem ewigem selgræt sein selbes sei vnd aller seiner vorvodern vnt nahchomen sel hail vnd sælden. Er hat auh vns gegeben vnd gechauft einen hof, der genant ist Winpo^essing^c von herm Eberharten dem Chalp vmb ahtzehen phunt Regenspurger, vnd ob vns dehainerlai arbait oder chost dar auf ist gegangen, do fu^er hat er vns geben sehs phunt Regenspurger. Daz gu^ot ist alles geaht zv dreuzehen phunten gu^elt Salzpurger phenning. Von dem gu^ot, swer denn herre vnd abbt ist, der schol vns aller samnung ewichleichein alle vreitag geben sehtzich phenning Salzpurger vmb viesch. Wser aver daz, daz man der fiesch an dem vreitag nicht gehaben mæht, so schol man sev vns dar nah an dem næhsten tag geben oder in der næhsten wohhen dar nah zwai mal geben, vnd schuln wir des an dehain ander vnser phru^ent niht engelten. Geschæh auer daz von dehainer versaumchait, daz man vns des niht stæt behi^elt vnd vns di viesch niht engæb, als offt daz versaumt wær, als offt schuln di selben phenning geben werden dem erwærigen abbt von Salmonsweier^d, vnd schol auh alle jar in der weisung der selb abbt den chelnær dar vmb vragen, ob es behalten sei vnd gegeben der sammung oder niht. Vnd daz ditz sæligs selgræt dem vorgenanten erwærigen herren vnd vrevnt herm^e L(udweich) dem Grans vnd auh vns stæt beleih, hat er selben mit samt vns den vorgenanten erwærigen vater, herren vnd||
weiser, abbt Vlreichein von Salmonsweiler^d vleizchleichein gebeten, daz er im vnd vns daz gestætigt hat an disem brief mit seinem insigel. Vber daz alles hat auh vns der offt vorgenant herre vnd vrevnt her L(udweich) der Grans sant Erasmi alter in dem vorzaihen gestift vnd gewidemt mit alle dem, daz dar zv geho^ert, vnd hat vns dar zv gechauft den hof ze Tal vmb ahtzen phunt Salzpurger. Daz auh di gu^otæt vnd ditze selgeræt von debainem seinem erben nah seinem tot vns meg gechrencht werden, hat er vns es alles auh gestætigt an disem brief mit sein selbes insigel. Dar vber wir abbt Vlr(eich) von Raitenhaslach mit samt vnser samnung vergehen vnd geloben an disem brief, daz wir di ablæib vnd auh den jartag seines tots mit der vigîli vnd mit den messe singen vnd mit ander gaistleicher gu^otæt allen weis begen schuln, als eines anders vnder vns bruders vnd briesters ablæib^f. Daz auh wir daz alles stæt behalten vnd von vnsern nahchomen ewichleichein behalten wert, verinsigeln wir disen brief mit des vorgenant vnsers maister vnd erwærigen abbt Vlr(eich) insigel von Salmonsweiler^d vnd mit vnsers selbes insigel. Dez sint zevch: her Ortlieb von Walde^g, her Alram der Rotawer, her Seifrid der Ahaimer, her Hainr(eich) der Pahner, her Eberhart der Chalb, Ch(unrat) der Nævslingner^h; her Fridr(eich) der pharrer von Purchausen, her Seibot des Grans Schreiber, her Ilsunch vnser prior, her Gebh(art) der subprior, maister Vlreich von Salmonsweiln, her Ditreich von Permæting, her H(ainreich)ⁱ der chelnær, her Hainr(eich) der cu^oster vnd ander biderb^k lævt mer. Der brief ist gegeben, do von Christes bu^ort waren tausent drev hundert vnd sehs jar Servacii episcopi.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 541, S. 455-457