Wir Eberhart von gotes genaden brobst, Paul techent vnd allez capitel ze Berthersgadem^a verjehen vnd offen an | disem prief allen den, di in sehent oder ho^erent lesent, daz wir den ersamen vnd gaistleichen herren dem conuent ze Raytenhaslach vnd irn pflegærn des siedens ze dem Hællein pru^oder Chu^onratn dem Wienner vnd pru^oder V^olschalhen erchennen fumftzich chlafter, die si in vnserm perig vnd aigen geworiht habent, daz dazselbe vnserr vorvodern vrlaub gewesen ist vnd auch im vnser wille ist, vnd darzv^o erlauben wir in noch furbaz ze varen in derselben schaftriht dreizzich chlafter zv^o den zehenn, di si vor nach den vorverschriben fumftzich chlaftern an vnser wizzen geworiht heten, mit sogetaner beschaidenhait, daz si in denselben viertzich chlaftern paun schullen zwai sinchwerich vnd niht mer auf ainer want oder auf paiden swederhalb in daz fu^egleich ist, vnd sullen derselben viertzich chlafter mit den zwain sinchwerichen vnd mit ainer wer, ob si wellen nach perchweriches reht niezzen, so si maist mugen, an daz si dehain cherwerich weder vnder sich noch neben sich haben noch varen sullen, wan di rehten schaftriht mit den zwain sinchwerichen, di in erlaubet sint. Vindent si daselben ehern nach ir willen, daz ist vns lieb, wær des niht, daz ist vns lait, doch ist schad vnd frum ir. Wær aber, daz si stain oder vrische irret, daz sullen si zeitleich vmbeuaren, also daz si an di lenge iht mer varen, danne di vorgeschriben viertzich chlafter vnd desselben perges, als verre wir in den hie erlaubet haben mit den sætzen, di hie verschriben sint, sullen wir ir rehte gewern sein, swa vnd swenne si des bedurfen, an aller der stat, da wir daz durch reht tu^on sullen. Tæt aber in darvber iemen gewalt daran, des got niht geb, des wellen wir in niht gepunden sein. Vnd darvmb, daz wir in daz erlaubet haben, habet si vns vnd di vnsern geeret mit drein vnd dreizzich pfunden Salzburgær pfenning. Vnd daz furbaz diser gewerft in vnd vns stæt vnd vnzebrochen beleih, geben wir in disen prief versigelt mit vnsern insigeln. Disev sache ist geschehen, do von Christes geburt waren dreutzehen hundert jar vnd darnach in dem ahten jar, an san Alexen tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 551, S. 465-466