Ich Alphart, ich Tanchwart vnd ich Seifrid wir drei bru^eder von Ditmænning^a verjehen vnd tu^en chunt alle den, | di disen prief sehent oder lesen horent, das wir durich got auf di gnad auh vnd auf di fuderung des erwærigen apt Gebharts vnd seins conuents von Raitenhaslach vns gæntzleichein verzigen haben aller der ansprach, di wir hinze in gehabt haben vmb das gu^et ze Chrægling^b, vnd dar vmb ze gnaden vnd ze lieb hat vns der vor genant erwærig apt G(ebhart) vnd sein samnung geben drew pfunt Salzburger phenning. Dar vber offen auh wir an disem prief, das wir ein ansprach auh heten hintze dem vorgenanten gotshaus vnd samnung ze Raitenhaslach vmb etzwiuil phenning, di vnser vater, dem got genad, do hin der||
samnung schuld haben ze ehalten geben; der selben ansprach haben wir vns auh gantzleichein verzigen, wan wir des wol geweist sein, daz wir der samnung vnd dem gotshaus Raitenhaslach vnreht dar an haben getan. Vnd do von haben wir vmb di sahhe des offt vorgenanten erwærig apt Gebh(arten) vnd seiner samnung gnad vnd huld mit vnser freunt hilf vnd pflig gewnnen. Vnd das wir furbas dehainerlai ansprach icht hinze dem gotshaus Raitenhaslach haben, geben wir in disen prief versigelten mit dem insigel des erwærigen landrihters hern Wernhards des Zuchswerts von Dietmænning^a, wan wir aigens insigels selben niht haben. Der sahhe sint zeuch: her||
Ilsung der prior, her Hainreich der portnær, her Ot der custer, her Fridr(eich) der chamerær, her Chunrat der Vogel, her VIreich der chelnær, herren vnd bru^eder ze Raitenhaslach; her Chunrat der Lamp, Hainr(eich) der Smerpech, Hainr(eich) der Mæwer^c, Symon der Schreiber, Ch(unrat) der Freioltsmoser, Merten der chamerær, Fridreich Chrophel, Fu^ortær des Zuchswerts chneht, Eiler von Fridolfing, Stolz, Fridreich der Darm, H(ainreich) der Tren, H(ainreich) der Pu^ohs vnd ander pider læut mer. Der prief ist geben ze Ditmænning^a, do von Christes bu^ort vergangen waren dreuzehen hundert jar dar nah in dem ahten jar, an sant Michahels tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 553, S. 466-467