Ich Mathias, heren Rapotes svn, von Vrfar, richter daz Chrems pei den zeiten, tven chvnt allen den, die disen prief sehent oder horent lesen, die nv sint oder her nach | chvnftich werdent, daz der edel herr her Wolfger von Dachsperch ansprach heren Vlreichen den hofmaister in Raitenhaslaher hof in seins closters^a namen vmb ein havs daz Chrems innerhalb der mavber, daz haizst der Chiel, swie iz doch von alten ding genant wer des chavfmans havs, also verr, daz derselb hofmaister mvest antwuerten ze Chrems^b in der schran vnd zaigt avch einen prief versigelt mit seins abtz vnd seiner sambnvng insigel, daz er gewalt hiet ze antwurten ze gewinn vnd ze flvst vmb daz vorgenant havs. Vnd nam avch sich der vorgenant herr her Wolfger die chal an fvr sich vnd fvr sein prueder mit ir gvetleichem willen heren Hainreiches vnd heren Vlreiches, also ob der vorgenant hofmaister im enprest, er wer avch seinn prvdenn enprosten. Da enprast der hofmaister dem vorgenanten herren heren Wolfgeren von Dachsperch mit vrag vnd mit vrtail vor dem gericht mit recht vmb die selb ansprach, die er vnd sein prveder heten gehabt auf daz^c e genant havs. Vnd dar vmb, daz fvrpaz dev sambnvng von Raitenhaslach an all ansprach von dem oft genanten herren heren Wolfgeren vnd seinn prvederen fvrpaz gervet peleiben vmb daz selb havs, so gib ich derselben sambnvng disen prief versigelt mit mein insigel. Vnd der sach sint avch gezevch: her Rveger der alt richter, her Gotfrid auf dem marcht, her Engelprecht, her Pilgreim, her Vlreich, heren Liebmanss svn der Pertelme, Gensei auf dem marcht, der Levpolt der Pilichdorfer, der Walchvn, her Chvenrat der Dvrst, her Seifrid von Mavtaren, her Ekprecht, her Nicla der Zehentner, her Larenz heren Rapotes svn, Gotfrid sein prveder, her Hertweich des screiber svn, her Levpolt^d sein prveder, her Gozz ze Stain, her Chvenrat sein prveder, her Hainreich der Regenspvrger, her Hainreich vnd der andere sein prveder, her Haistolf, her Rveger von Pazzav vnd ander frvm levt, den dev sach wol chvnt ist. Der prief ist gegeben, dv von Christes gepvert waren drevzehen hvndert jar da nach in dem nevnten jar, nach sant Veiztag des nehsten phinztais.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 558, S. 471-472