Ich Chunrat Pouman^a ze Pupftal^b mit samt meiner housfrowen Jævten vnd meinen sv^enen Liebharten, Wilhalmen, | Vlreichen vnd Chunr(aten) vnd meiner tohter^c Elspeten verjehen vnd tu^on chunt alle den, di disen brief lesen ho^erent oder sehent, das wir alle gemainchlichen gestanden sein von alle dem chrieg vnd ansprah, div wir vntzen an den hæutigen tag gehabt haben vmb dev hu^ob ze Pupftal, vnd switan schaden wir von den erwerigen æbten ze Raitenhaslach vnd irer samnung oder amptlæuten oder von dem pann, dar in wir chomen waren, enpfangen haben, gænzleichein in dev hant vnd gnad des erwerigen apt Ilsunchs aitzweis gegeben haben. Des hat der vorgenant apt Ils(unch) von Raitenh(aslach) mit samt seiner samnung vns genadet vnd habent vns di selben hu^ob ze Pupftal sehs jar lassen ze poumansreht, also daz wir in die ze dem tritail alle jar dienen schuln allen weis, als wir sei^d vor dem smit von dem Neunmarcht^e gedient haben, aber nah den sehs jaren schuln si di hu^ob mit vns oder mit andern, swem si wellent, stiften freileihein als ander ires gotshous aigen gu^ot, vnd haben weder wir noh dehainer vnser freunt oder nahchomen dar wider dehain reht oder ansprah iht ze chriegen. Vnd zv einer festen stætichait dirr sahhe haben wir mit vnser pett vnd vlieg erworven von herren Hainr(eich) dem Ganzen^f erwern vicedum von der Rot vnd von herren Gerhohen dem Radekker, daz si disen brief versigelt habent mit iren insigel. Der sah sint zevg: herre Hainr(eich) der pfarrer von Schonperg^g, her Vlr(eich) pfarrer von Perchirchen^h; Rudolf der Chatzpech, Frid(reich) der Hu^ober, F(ridreich) Darm, Ch(unrat) der probst von Pfæffing, Ch(unrat) der Puntschu^oh, Wilhalm, H(ainreich) vnd Ch(unrat) sein svn, Vlr(eich) der Zeilignerⁱ, Ott von Chunihing vnd ander pider læut mær. Der brief ist geben an^k sant Vincencii tag anno domini millesimo. CCCmo. duodecimo^l.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 572, S. 482-483