Wir Heinreich, Ott vnd Heinrich pfallentzgrauen ze Rey/^n vnd hertzogn in Baiern verjehen offenbar an disem brief, daz wir mit vnsers lieben herren vnd pfleger | hern Ludweiges des Romischen chv^eniges rat, willen vnd gvnst vnd heizzen vnd avch dvrch die genade vnd andaht, die alle vnsern vodern zv^o dem conventte vnd chloster ze Raitenhaslach gehabt habent, bestetigen vnd newen dem chloster alle die genad vnd reht vnd vreivng, dev si von allen vnsern vodern v^eber allev ir gerihtt, levt, gv^ot vnd v^eber alle ir vreivng avf dem wazzer vnd auf dem lande in allem vnserm lande habent. Wir tv^on avch chvnt mit vnsers üben herren vnd pfleger des vorgenanten chv^enig Lvdweiges rat, willen, gvnst, wizzen vnd heizzen dev genade dem vorgenanten chloster, daz si in vnsern steten, daz ist ze Pvrchausen^a vnd ze O^eting, ie in der stat ein haus sv^ellen haben in rehter aigenscheftt nvr in den zwain steten alein vreies vnd lediges an alle stewer, wahte vnd ander bedwanchsal vnd an alle vodervng, swie si geheizzen ist, von vns, von vnsern vitztv^em vnd allen andern amptlevten, swie si genant sint, vnd fv^er alle vodervnge vnser purger, swer si sein, in den vorgenanten zwain steten, mit der bescheidenheit also, daz si allez ir gv^ot, swie ez genant ist, gehandein mv^egen in den selben [iren]^b hevsern mit chaeuffen vnd mit verchauffen allen den weis nach irem nvtze an alle irrvng vnd wider red vnser amptlevt vnd auch vnser purger in den selben êgenanten steten, swie si genant sein. Wir tv^on avch dem vorgenanten chloster die genad, daz si chost, ez sei wein, pro^vt, cha^ese, fv^oter, hawe vnd allen getraide, swie der genant ist, vnd gemainlich allez, daz man zv^o dem oft genanten chloster oder von dem chloster fv^eret, treibet oder traget, si selb oder ir lævt, daz dem chloster zv^o geho^ert, ez sei auf dem wazzer oder auf dem lande, an zollesteten oder an mavttsteten ze Pvrchausen oder ze O^eting, ze Hohenwartte vnd gemainlich an allen vnsern zollesteten vnd mavttsteten in vnserm lande, daz man si an nihtev irren noch engen sol vnd si an allen zol vnd mavtt vreilich varen lazzen sol an allev irrevng; vnd allev ervng, die si an den zolsteten vnd mavttsteten von bescheidenheit vnd niht von reht getan habent, die nemen wir alle ab vnd wellen vnd gebieten ev allev, daz ir si vmb solich vodervng fv^erbaz nimmer mere irret noch pfrennget. Vnd daz in daz also stæt, gantz vnd vnzerbrochen beleihe, geben wir in disen brief fv^er vns, vnsern liben brvder Otten vnd fv^er vnsern liben vettern hertzog Heinreichen mit vnserm hertzog Heinreiches grozzem insigel versigelten. Vnd ist daz geschehen, da von Christes pv^ertt waren tavsent jar drevhvndert jar dar nach in dem fv^emftzehenten jar, des mitichens in der pfingstwochen.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 596, S. 506-507