Wir Heinrich vnd Otte vnd Heinrich von gotes genaden pfallentz graven ze Ryn, hertzogen in Baiern, vergehen offenbar I an dem brief, daz wir gesehen vnd geho^ert haben di hantvest, di vnser vorvodern sæligen dem ersamen chloster ze Raitenhaslach habent gegeben vnd auch di selben vnser lieber vater vnd veter chv^enig Ott von Vngern vnd hertzog Stephan, den got genad, gestæit vnd genêwet habent mit ir brieven, vmb di hævser, di der aptt vnd aller der conventt dez obe genanten chlosters ze Raitenhaslach in vnsern stêten, eines ze Purchavsen vnd eines ze O^eting, haben sv^ellen in rehter aigenschaft an alle stiwêre, bedwanchsal vnd gemainlich an alle vodervng, swi dev sei gehaizzen, von vns, vnseren vitztv^emen, swi di sin genant, allen andern amptlevten vnd von aller vodervng vnser purger, swer di sint oder swi sint genant, in den selben stêten, so daz si allez ir gu^ot in den selben hævseren mv^egen wandeln vnd handeln an alle vnser amptlevt vnd purger da selben irrevng, dar zv^e auch alle chost an wein, prot, fv^eter, hæv, getraid, swie daz sei genant, vnd gemainlich allez dez si bedv^erfen in dem chloster, swaz daz fv^erent vber lant, avf wazzer, an zolsteten oder mavtsteten, daz man si dar an niht irren sol vnd in daz freilich an alle vodervng zo^elle vnd der mavt sol fv^er gen lazzen. Di selben genad vnd freihait durch vnser vnd vnser vorvodern sælichait stæten vnd nêvwen wir mit vnsers lieben herren vnd phlegers hern Lud(weig) des Ro^emischen chv^eniges willen, gvnst, vnd haizzen dem selben aptt, allem convent^a vnd dem chloster ewichlich ze behalten vnd wellen vnd gebi^eten allen vitztv^emen, rihtern, schergen vnd auch purgern ze Purchavsen vnd O^eting, allen vnsern zolnæren vnd mavtnæren in di genad stæt ze behalten vnd in di an nihtev vber varn. Vnd geben ze vrchv^ende disen brief versigelten mit vnserm grozzem insigel. Der ist geben millesimo CCCmo. XVmo, des svnntages vor sant Jo^ergen tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 595, S. 505-506