Ich Hainreich der Pollignær vergieh vnd tu^on chunt alle den, di disen brief ansehent, das ich vnd mit mir | alle meinev chint, das sind Chunrat mein su^on vnd Margaret, Gedru^od vnd Mæhthilde mein to^ehter vns gaentzleih verzigen haben aller der ansprah vnd chrieges, den wir heten oder gehaben mahten hintze dem gotshous ze Reitenhaslach vmb switan sahhe, di gesein maht, vnd besunderleih vmb ein gu^etel ze Polling vor Raitenhaslaher hof, do der Mergel auf sitzet, das mein aigen gewesen ist vnd mein bru^oder Meinhart, dem got genade, an mein wissen dem vorgenandten gotshous vnser frawen hintze Raitenhaslach ze selgeræt gegeben het vnd dar vmb zv ainer ergetzung von dem herren, der ze den selben Zeiten apt was, enpfangen vnd genummen het aht pfunt pfenning Regenspurger. Des selben gu^ots ich mich nv anderstunt mit meiner obengenanten chinde wiln vnd gu^enst vnd si mit samt mir vns verzigen haben vnd vnser frawen hinze Raitenhasl(ach) auh ze selgeræt auf gegeben alle haben, hat dar vmb der erwerig herre vnd abt Ilsunch mich Hainr(eich) den Pollignær geêret mit æinem pfunt pfenning. Vnd das im furbas von mir vnd meinen chinden, di ich ietzunt han oder noh gewinnen mag, dehain ansprah oder chrieg niht mer chomen meg, han ich^a in disen brief gegeben verinsigelten zv einem ewigen vrchunt diser sahhe mit dem insigel hern Johans des Pfæffingners des erwern rihters ze Mu^eldorf vnd mit mein selbes insigel. Sint auh zevg der sahhe: her Chunrat mein bru^oder der erwer verweser vnd pfarrer von Flossing, her Walchun pfarrer von Taufchirchn, her Eberhart der Harschircher, Chunr(at) der Rauter, Ekk, Ot der Zehentner, Vlreich Gu^effel, Hainr(eich) der En, Wernhart der Fritzenwegner, Weinmar von Perchaim, H. der Schonschuster vnd ander pider læut mær. Der brief ist gegeben ze Mu^eldorf, do von Christes burt waren vergangen tausent jar drew hundert jar dar nah in dem fumfzehenten jar, an sant Johannis vnd Pauli tag.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 598, S. 509-510